छेँ छायेपीत माःगु फर्निचर सम्बन्धी मेला

येँ – न्हूगु छेँ छखा दनेगु व उकियात चिटिक्क धायेक छायेपीगु इच्छा सुया मदइ । न्ह्याम्हं मनूया जीवनय् छेँ छखा दनेगु व उकियात फक्व बांलाक व अत्याधुनिक फर्निचर नापं सुविधासहित छायेपीगु इच्छा जुइ । थथे छेँयात छायेपीगु निंतिं आवश्यक फर्निचरय् जक दँय्दसं ३० अर्ब तका बराबरया कारोबार जुइगु यानाच्वंगु छगू तथ्यांकं क्यंगु दु ।

नेपालय् छेँ छायेपीगु निंतिं अतिकं महत्वपूर्ण व आवश्यक फर्निचरय् दँय्दसं स्वीगू अर्ब तका बराबरया कारोबार जुइगु यानाच्वंगु दु । अझ उकिसनं लिपांगु इलय् नेपाली उत्पादनया फर्निचरपाखें हे आत्मनिर्भर जुइगु लँपु दयेक दयेकं नं विदेशं फर्निचर आयात यायेगु ज्या नं उतिकं अप्वयाच्वंगु दु ।

नेपाःमितय् छेँ छायेपीगु इच्छानापं नेपाःया थःगु हे मौलिक व परम्परागत फर्निचरलिसें आधुनिक शैलीया फर्निचर उत्पादन बारे जानकारी बीगु ल्याखं नेपाल फर्निचर तथा फर्निसिङ संघं छगू मेलाया ग्वसाः ग्वयेगु तयारी याःगु दु । थ्व हे वइगु भदौ १४ गतेनिसें जुइगु मेलाया उद्देश्य फर्निचर व फर्निसिंङया बारे आवश्यक सकतांकथंया जानकारी छगू हे थासं बीगु संघं न्ह्यथंगु दु ।

संघ मेलाया ग्वसाः ग्वयेगु ल्याखं छगू पत्रकार सम्मेलन यासें बिउगु जानकारीकथं मेलाय् लिपांगु इलय् विश्वय् प्रचनलनय् वयाच्वंगु थीथी कथंया फर्निचरया बारे विशेष जानकारी बीगु नापं कारोबार नं याइगु जूगु दु । मेलाय् कार्पेट, झ्याः–लुखाय् तयेगु पर्दा, म्याट्रेस, होम डेकोर, ज्याकूया निंतिं आवश्यककथंया फर्निचर, मेशिनरी ज्याभः, डेकोरेसनया निंतिं आवश्यक हलंज्वलंलिसें वास्तुलिसे सम्बन्धित उत्पादन नं मेलाया आकर्षण जुइगु ग्वसाः खलःया दावी दु ।

लिपांगु इलय् जीवनशैलीइ वयाच्वंगु आधुनिकतालिसें अप्वया वनाच्वंगु ‘इन्टेरियर डिजाइन’या निंतिं व थःगु छेँ, बंगला आकर्षक खने दयेके छायेपीगु इच्छा यानाच्वंपिनिगु निंतिं मेला छगू उचित गन्तव्य जुइ फइगु ग्वसाः खलःया विश्वास दु । लिपांगु इलय् फर्निचर व फर्निसिंगय् नेपाः आत्मनिर्भर जुइगु लँपुइ न्ह्याः वनाच्वंगु व उकिया निंतिं नेपाली उत्पादन हे छ्यलेमाःगु संघया धापू दु ।