ने. सं. ११४४ कछलागा सप्तमी -

अमेरिकाय् नेपाःया बौद्ध सम्मेलन

येँ – नेपाःया बुद्ध धर्मयात विदेशय् नं प्रचार यायेगु ताः तयाः थुगुसी अमेरिकाय् तःन्हु तक जुइगु ज्याझ्वः शुरु जूगु दु । नृत्य मण्डल विहारया झिदँ बुन्हिया लसताय् अमेरिकाया पोर्टल्याण्डय् म्हिगःनिसें थ्व ज्याझ्वः न्ह्याःगु खः । ज्याझ्वलय् बुद्ध धर्मय् संस्कृत आखः, नेवाः बुद्ध धर्मया संस्कृति, ध्यान भावना अािद बारे ज्यापौ न्ह्यब्वइगु ग्वसाः दु ।

अथे हे मेगु वालय् डा. गौतम वज्राचार्यं नेपाली बौद्ध कला बारे ज्यापौ न्ह्यब्वयादी । अथे हे एलिशा ग्राहमं नेपाःया बुद्ध धर्मय् ख्वाःपाः पुनाः याइगु हुलाप्याखं बारे ज्यापौ न्ह्यब्वइगु ग्वसाः दु । उकथं हे अक्टोबर महिनाय् नेपाःया वज्रयान चचा प्याखं बारे डा. मिरान्डा ई. शां ज्यापौ न्ह्यब्वयादीसा दयारत्न शाक्यं नेवाः परम्परा व संस्कृति बारे ज्यापौ न्ह्यब्वयादी ।

उकथं हे नोभेम्बर महिनाय् डा. क्रिष्टोफर एमरिचं नेपाली बौद्ध साहित्य बारे ज्यापौ न्ह्यब्वइगु ग्वसाः दुसा डा. मिरोज शाक्यं पवित्र मन्त्र व धारणी बारे ज्यापौ न्ह्यब्वयादी । मय्जु एक्सी त्रिस्टान कोड्रेस्क्यूं दैवी दबू बारे ज्यापौ न्ह्यब्वयादी । लिसें डा. अलेक्जाण्डर भोन रास्पाटं नेपाःया बौद्ध जीवनय् संस्कार व संस्कृति बारे ज्यापौ न्ह्यब्वयादीगु ग्वसाः दु ।

थ्व फुक्कं ज्याझ्वःया समापन नोभेम्बर १० तारिख कुन्हु जुइ । उगु इलय् होम यायेगु लिसें चचा प्याखं नं न्ह्यब्वइगु ग्वसाः दु । अमेरिका व युरोपय् बुद्ध धर्म धाल कि तिब्बती बुद्ध धर्मयात जक जुइकीगु जुयाः नेपाःया बुद्ध धर्म बारे उलि चर्चा मजू । उकियात हे ध्यानय् तयाः थ्व ज्याझ्वः यायेत्यनागु खँ नृत्य मण्डल महाविहारया प्रमुख प्रज्वल वज्राचार्यं कनादिल ।