येँ (नेपालभाषा टाइम्स) – तत्कालीन एमाले व माओवादी केन्द्र एकीकरण लिपा सुनसान जुयाच्वंगु माओवादी केन्द्रया पुलांगु ज्याकू पेरिसडाँडा थौं चायेकीगु जूगु दु ।
नेपाल कम्युनिष्ट पार्टी (नेकपा) या पार्टीगत कार्यकारी अधिकार फुक्कं निम्हम्ह अध्यक्ष पुष्पकमल दाहालयात प्राप्त जुइवं वय्कलं थःगु अध्यक्षताय् थौं च्वनेत्यंगु न्हापांगु सचिवालय बैठक थःपिनिगु हे पुलांगु ज्याकू पेरिसडाँडाय् सःतादीगु खः । पार्टीया कार्यकारी अधिकार थःगु ल्हातय् वयेवं च्वनेत्यंगु न्हापांगु बैठक थःपिनिगु हे पुलांगु ज्याकुथी सःतेगु दाहालया थ्व निर्णययात पार्टी दुने अर्थपूर्ण रुपं कया हःगु दु। थ्व स्वयां न्ह्यः पार्टीया फुक्कं बैठक वालुवाटार वा पूर्व एमालेया केन्द्रीय ज्याकुथी च्वनेगु याना वयाच्वंगु खः ।
दाहालं थःगु ल्हातय् कार्यकारी अधिकार लायेवं पेरिसडाँडाय् सचिवालय बैठक सःतादीगुया अर्थ पार्टीया ज्या व सरकारया ज्या अलग अलग हे खः धइगु सन्देश बीगु लागिं खः धया हःगु दु। वय्कलं सःतादीगु थ्व बैठकय् प्रधानमन्त्री केपी शर्मा ओलीं नं ब्वति कयादीगु खँ धाःगु दु। दाहालं म्हिगः ओलीलिसे हे सल्लाह यानाः पेरिसडाँडाय् बैठक सःतादीगु खः ।
पार्टी एकीकरण लिपा पेरिसडाँडायात पार्टीया जनवर्गीय संगठनतय् ज्याकू निर्धारण याःगु खःसां अन पार्टीया बैठक धाःसा छकः निकः जक च्वनेगु याःगु दु। उगु ज्याकुथी प्रम ओली आः तक छकः जक झाःगु दु । दाहालं पार्टीया बैठक पेरिसडाँडाय् सःतूगुलिं पूर्व माओवादी नेतात लय् ताःगु दुसा पूर्व एमाले नेतातय्सं धाःसा ‘एमालेया ज्याकू मर्मत जुयाच्वंगुलिं पेरिसडाँडाय् बैठक सःतूगु’ धायेगु याना हःगु दु ।
थौं च्वनीगु बैठकं मन्त्रिपरिषद् पुनर्गठनया नापं पार्टी एकीकरण लिपा याये ल्यं दनिगु ज्याखँ न्ह्याकेगु बारे निर्णय यायेगु एजेण्डा दयेकातःगु दु। पार्टीं आः सरकार सञ्चालन व सरकारी नियुक्तिया ज्याय् नं हस्तक्षेप अप्वयेका यंकीगु खँ धाःगु दु ।
LEAVE YOUR COMMENTS