ने. सं. ११४४ कौलाथ्व सप्तमी - फूलपाती

असोज १३ निसें नोट हिले दइगु

येँ(नेपालभाषा टाइम्स)-नेपाल राष्ट्र बैंकं मोहनिया निंतिं वइगु असोज १३ निसें नोट हिले दइगु सुविधा बीगु जूगु दु । बैंकं मोहनियात लक्षित यानाः सर्वसाधारणयात असोज १३ निसें २२ गतेतक नोट हिले फइगु सुविधा बीत्यंगु खः । थुगुसी राष्ट्र बैंकं मोहनिया निंतिं न्हापा लिपा थें न्हूगु नोट धाःसा पित मबीगु जूगु दु । उकिया थासय् यचुगु (सफा), बांलाःगु व न्हूगु थें खने दुगु नोट हिले फइगु जानकारी बिउगु दु ।

राष्ट्र बैंकं छगू सुचं जारी यासें मोहनि नखःया इलय् आपालं मात्राय् न्हूगु नोटया माग जुइगु चिचिधंगु दरया नोट हिले फइगु थाय् व ईया जानकारी बिउगु दु । राष्ट्र बैंकं बैंकया मुद्रा व्यवस्थापन विभाग, बैंकिङ विभाग व प्रदेश ज्याकू विराटनगर, जनकपुर, वीरगञ्ज, पोखरा, सिद्धार्थनगर, नेपालगञ्ज व धनगढीं क्वःछिनातःगु दिनय् सफा नोट हिले फइगु जानकारी बिउगु दु ।

राष्ट्र बैंकं जारी याःगु सुचनय् न्हापा न्हापाया दँय् छक्वः नं छ्यलाबुलाय् मवःगु न्हूगु नोट हिले फइगु व्यवस्था याना वयाच्वंगुलिइ थुगुसी धाःसा न्हापा प्रयोगय् वयेधुंकूगु सफा, चिटिक्क च्वंगु नोट हिले फइगु धयातःगु दु । थुकथंया नोटया मौज्दात दत्तले न्हूगु नोट पित मबीगु बैंकया नोट व्यवस्थापन विभागं न्ह्यथंगु दु । थ्व स्वयां न्ह्यः न्हूगु हे नोट पित बिया वयाच्वंगु बैंकं मोहनिया इलय् पित बीगु नोट हिलेगु याःसां लिपा नखः सिधयेधुंकाः हाकनं बैंक, वित्तीय संस्थापाखें हे लित वइगु व अज्याःगु नोट थातंं तया तयेमाःगु व नखः धुनवं अज्याःगु नोटया माग नं मजुइगुलिं थुगुसी सफा, यचुगु नोट जक पित बीत्यनागु बैंकं न्ह्यथंगु दु ।

नखः सिधयेकाः बंैंक, वित्तीय संस्थापाखें लिहां वइगु अज्याःगु नोट धुकुतिइ स्वथनातयेगु इलय् गले जुइगु, फ्वसा ह्वइगु, ध्वगिना वनीगु जूगुलिं अज्याःगु अवस्था वयेके मबीत थुगुसी पुलांगु हे बांलाःगु, सफागु व यचुगु नोट हिलेगु व्यवस्था यायेत्यंगु खः ।

मोहनिया इलय् न्यतका, झितका, नीतका, न्यय्तका व सछि तका वंगु दरया नोट दकलय् अप्वः माग जुइगु राष्ट्र बैंकं न्ह्यथंगु दु ।