ओलीया नेतृत्व जसपायात अमान्य

येँ – जनता समाजवादी पार्टीं वर्तमान प्रधानमन्त्री केपी शर्मा ओलीयात प्रधानमन्त्रीया रुपय् स्वीकार याये मफइगु खँ धाःगु दु । केन्द्रीय कार्यकारिणी समितिया दुजः गंगानारायण श्रेष्ठं ‘नेपालभाषा टाइम्स’ यात थ्व खँ कनादीगु खः ।

वय्कलं नेकपा एमाले लिसे सत्ता समीकरण यानाः सरकार गठन जुइगु सम्भावना दुसां नं ओली नेतृत्वयात धाःसा स्वीकार यायेत थःपिं तयार मदुगु खँ कनादिल ।

सरकार गठन लिसें राजनीतिक पार्टी लिसे सहकार्य यायेगु नितिं आः न्याम्ह नेतातय्त जिम्मेवारी बिउगु खँ कँसें वय्कलं चैत ५ गते च्वनीगु कार्यकारिणी समितिया बैठकं गुकथं न्ह्याः वनेगु धइगु निर्णय याइगु जानकारी नं बियादिल ।

सरकार गठन बारे थीथी पार्टीलिसे सहलह यायेत जसपां न्याम्ह नेतातय्त जिम्मेवारी बिउसां अन्तिम निर्णय धाःसा कार्यकारिणी समितिं याइगु खँ दु । जसपां थःपिसं ल्ह्वनाच्वनागु माग पूवंकीगु पार्टीलिसे जक सत्ता समीकरण यायेगु तयारी यानाच्वंगु खँ नं धाःगु दु ।
जसपां रेशम चौधरी लगायतया थारु नेता कार्यकर्तातय् विरुद्ध तयातःगु मुद्दा लित कायेमाःगु, थरुहट संविधान संशोधन यायेमाःगु माग न्ह्यःने तःगु दु ।

जसपाया उगु मागयात एमालें सम्बोधन यायेगु बचं बिउसां नं उकियात पत्याः धाःसा यानाच्वंंगु मदुनि । प्रधानमन्त्री ओली समक्ष थःपिंसं उगु मुद्दा ल्ह्वनागु खःसां प्रधानमन्त्री ओलीं उकी चिउताः मतःगु कारणं जसपां ओलीया नेतृत्वय् सरकार गठन याइगु जुल वल धाःसा उकियात स्वीकार यायेमफइगु खँ नं नेता श्रेष्ठं स्पष्ट यानादिल ।

एमाले व माओवादी केन्द्र अलग अलग जुइवं प्रधानमन्त्री केपी ओलीया सरकार अल्पमतय् लाः वंगु दु । उकिं ओलीं बहुमत खाकेगु लागिं जसपा दुने नं पुलांगु राजपा पुचःया नेतातय्त जक स्वापू तयाः खँल्हाबल्हा न्ह्याकूगु खः । छुं जुयाः जसपा टुक्रा जुयाः पुलांगु राजपा जक थःथाय् वल धाःसां ओलीयात बहुमत गाइगु जुयाः ओलीं माल धाःसा जसपा हे टुक्रा यानाः जूसां पुलांगु राजपायात सालेत स्वयाच्वंगु खँ सूत्रं धाःगु दु । थुकिं यानाः आः जसपाय् नं तनाव ब्वलंगु सूत्रया दावी दु ।

सरकारया खँय् जसपा दुने तनाव

प्रधानमन्त्री केपी ओलीं थःगु सरकारयात बहुमत खाकेगु लागिं जसपाया छगू पुचःलिसे खँल्हाबल्हा याःगु कारणं जसपा दुने आन्तरिक कचवं ब्वलंगु दु । जसपा दुने नं पुलांगु राजपाया नेतातलिसे जक प्रधानमन्त्री ओलीं खँल्हाबल्हा याःगु खः ।

जसपा दुनेया पुलांगु राजपाया नेतात एमालेलिसे जानाः सरकार गठन यायेत तयार दुसां पूर्व मधेसी फोरम, संघीय समाजवादी लिसें नयाँ शक्तिया नेतात धाःसा एमालेलिसे सरकार गठन यायेगु पक्षय् मदु । थुकिं यानाः सरकारय् वनेगु लाकि मवनेगु धइगु खँय् जसपा दुने कचवं ब्वलंगु खँ धाःगु दु । उकिं थ्व बारे पार्टी दुने सघन रुपं खँल्हाबल्हा न्ह्यानाच्वंगु दु । अथे खःसां थारू नेता रेशम चौधरीयात त्वःतेगु, थारू आन्दोेलनया कार्यकर्तातय् विरुद्ध तयातःगु मुद्दा लित कायेगु थेंज्याःगु मुद्दां यानाः धाःसा मेपिं नेतात नं मौन जूगु खँ सूत्रं धाःगु दु ।

सम्बन्धित बुखँ

LEAVE YOUR COMMENTS