ने. सं. ११४६ बछलागा पञ्चमी -

१८ वडाय् धिम प्रशिक्षण याःपिंत दसिपौ लःल्हात

येँ (नेपालभाषा टाइम्स)- येँ महानगरपालिका १८ वडाया ग्वसालय् स्वलायंक जूगु धिमे स्यनेज्या क्वचायेकाः दसिपौ लःल्हाःगु दु । येँ मनपा १८ वडास्थित पुष्पलाल स्मृति पार्कय् जूगु ज्याझ्वलय् वडा अध्यक्ष न्हुछेकाजी महर्जनं प्रशिक्षार्थीपिंत दसिपौ लःल्हानादीगु खः ।

ज्याझ्वः न्ह्यः ताहाननीस्थित नासःद्यःयाथाय् पुजा यानाः सकल प्रशिक्षार्थीपिंत बाजं लःल्हायेगु ज्या जूगु खः । धिमे प्रशिक्षणय् न्हय्दँ दुम्ह मचांनिसें ४८दँ दुपिं गृहिणीपिं यानाः मुक्कं ३५म्हेसिनं ब्वति काःगु खः ।

दसिपौ लःल्हायेगु ज्याझ्वलय् प्रशिक्षार्थीपिनि पाखें साँस्कृतिक ब्वज्या नं जूगु खः । ज्याझ्वः वडा दुजः हेराशोभा महर्जनं न्ह्याकादीगु खःसा वडा दुजः हेमज्योती शाक्यं लसकुस यानादीगु खः । धिमे स्यनेज्या गुरु अनिल महर्जनं (तुँछेँगल्ली) यानादीगु खःसा वय्कःयात ग्वाहालि सुजाता महर्जनं यानादीगु खः ।