चोलेन्द्रयात संवैधानिक संकट

येँ – सरकारं हःगु संवैधानिक परिषद् सम्बन्धी अध्यादेशं प्रधानन्यायाधीश दथुइ काइगु अवस्था वःगु दु । राष्ट्रपतिं मंगलवाः जारी याःगु अध्यादेश विरुद्ध अधिवक्ता ओमप्रकाश अर्यालं बुधवाः सर्वोच्च अदालतय् रिट दायर याःगु दु ।

सर्वोच्चय् रिट लाःगुलिं आः प्रधानन्यायाधीश चोलेन्द्र शम्शेर राणायात मछिंगु अवस्था वःगु दु । प्रधानन्यायाधीश राणा थ्व अध्यादेश कथं मंगलवाः हे संवैधानिक परिषद्या बैठकय् सहभागी जुइधुंकूगु दु । तर थ्व अध्यादेश प्रक्रिया हे बांलाक पूमवंक वःगुलिं तसकं विवादय् लानाच्वंगु दु । मन्त्रिपरिषद्ं सिफारिस यानाः राष्ट्रपतिं जारी याःगु धाःसां मन्त्रिपरिषद्या बैठकय् अध्यादेशया बारे निर्णय ला छु चर्चा तकं मजू । थ्व अध्यादेश विवादस्पद जूगुलिं प्रधानन्यायाधीशया भूमिकायात कयाः अध्यादेश वयेवं हे चर्चा जुइधुंकूगु खः ।

संविधानया मर्म अःखः, व्यक्तिगत स्वार्थया निंतिं जक हःगु अध्यादेश अथें हे सर्वोच्चय् रिट लाइगु अवस्थाय् दुगु खः । आः थुकिया विरुद्ध मुद्दा लाःगु व उगु मुद्दा विचाराधीन स्थितिइ वःगु जूगुलिं प्रधानन्यायाधीश आः परिषद्या बैठकय् वने मजिउगु खँ वःगु खः ।

आः हानं बैठक सःतल धाःसा वय्कलं मुद्दायात हे त्वह दयेकाः मवनेगु सुचं बीमाःगु सुझाव नं वःगु दु । संविधानय् खुम्ह मनू च्वनाः सर्वसम्मतं निर्णय यायेमाः धकाः तोके यानातःगु विषयवस्तु तकं निम्ह जक निर्णय याःसां जिउ कथं अध्यादेश हःगु जुयाः उकियात संविधान विपरित ज्या धकाः आलोचना याना हःगु खः ।