शाहरुखया म्ह्याय् नं तयार
थौंकन्हय् बलिउड ‘स्टार किड’तय्सं जायाच्वंगु दु । स्टार किडतय् भीडय् नं थौंकन्हय् न्हू पुस्ताया ‘स्टार किड्स’त बलिउडय् इन्ट्री यायेत तयार जुयाच्वंगु दु । थथे बलिउडय् इन्ट्री जुइत तयार जुयाच्वंपिनि दथुइ आः बलिउडया छम्ह सुपरस्टारया म्ह्याय् नं दुथ्याःवःगु दु ।
थ्व ‘स्टार किड’ मेपिं सुं मखु, बलिउडया बादशाह धाइम्ह शाहरूख खानया म्हयाय् सुहाना खान खः । सुहानां छु फिल्मं बलिउडय् इन्ट्री याइ धयागु ला स्पष्ट मजूनि, तर बलिउडय् दुहां वयेगु निंतिं धाःसा व पूवंक तयार जुयाच्वंगु दु । थुकिया खुलासा वया हे मां गौरी खानं याःगु खः ।
मुम्बइलय् जूगु छगू अवार्ड ज्याझ्वलय् गौरीं थः म्ह्याय् सुहानां बलिउड वयेत न्हापांगु फोटोशेसन यायेत्यंगु खँ धाःगु खः । अवार्डया रेड कार्पेटय् शाहरूख खानलिसे थ्यंम्ह गौरीयात पत्रकारतय्सं न्यंगु जुयाच्वन, ‘छिं थ्व दँय् छु अज्याःगु चिजयात पियाच्वनागु दु ?’
उबलय् वं लिसः बिउगु खः, ‘सुहानां याकनं हे छगू म्याग्जिनया निंतिं फोटा शुट यायेत्यंगु दु । छुकिया निंतिं फोटो शेसन यायेत्यंगु ला धायेमखु, तर जिं थुकिया प्रतीक्षा यानाच्वनागु दु ।’
थौंकन्हय् ‘स्टार किड’त फिल्मय् वये न्ह्यः हे सेलिब्रिटी थें जुयाच्वने धुंकी । सुहानाया नं यक्व हे फ्यान दयेधुंकूगु दु । वयात सोसल मिडियाय् फलो याइपिं यक्व हे दयेधुंकूगु दु । सोसल मिडियाय् वं थःगु तस्बिर नं यक्व हे तयेगु यानाच्वंगु दु ।
बलिउडय् थौंकन्हय् दकलय् अप्वः प्रतीक्षा यानाच्वंम्ह स्टार किड धाःसा जान्ह्वी कपुर खः । श्रीदेवीया म्ह्याय् जान्ह्वीं करण जौहरया ‘धडक’ फिल्मपाखें बलिउडय् दुहां वयेत्यंगु खः । न्हापा हे चर्चाय् वयाच्वंम्ह जान्ह्वी श्रीदेवी मदयेधुंकाः झन् हे प्रतीक्षाय् लानाच्वंगु दु ।
LEAVE YOUR COMMENTS