बुदिंया भिंतुना म्येँ कासाय् उत्कृष्ट कासामिया म्येँचाः पिदन

यल – बुदिंया भिंतुना म्येँ कासाय् उत्कृष्ट जुइत ताःलाःपिं न्याम्ह कासामिया म्येँचाः पिदंगु दु। कासाय् उत्कृष्ट न्याम्ह कासामिया सः दुथ्याःगु म्येँ मुना ‘सिरपाः’ आः नकतिनि छगू ज्याझ्वःया दथुइ पितब्वज्या जुल ।

नेपालभाषा सांगीतिक ख्यलय् नांजाःम्ह कलाकार सुरजवीर वज्राचार्यं मंगल धुनया लसय् ‘लय्ताः जि अति थौं, जन्मदिं छंगु’ म्येँयात कयाः ग्वसाः ग्वयादीगु चेज बुदिंया भिंतुना म्येँ कासाय् उत्कृष्ट न्यागू थासय् वयेत ताःलाःपिं कलाकारया सः दुथ्याकाः उगु म्येँचाः पिथंगु खः । सुरजवीर थम्हं हे च्वयाः हालादीगु म्येँय् संगीत संयोजन जुगल डंगोलं यानादीगु खःसा म्येँ कासाय् १२१ म्हेसिनं ब्वति काःगु खः ।

पेज थ्री बाःछिपौया ग्वसालय् चेज टेलिभिजनया मुख्य प्रायोजनय् जूगु कासाय् उत्कृष्ट न्याम्ह कासामिया सः दुथ्याःगु म्येँचालय् सुरजवीर ज्राचार्य, दर्शनवीर शाक्य, प्रकाशदीप श्रेष्ठ, पूर्णकाजी ज्यापु व हरिराम महर्जनं च्वयादीगु म्येँ दुथ्यानाच्वंगु दु। वय्कःपिंसं च्वयादीगु म्येँयात छसिकथं कासाय् न्हाप लाःम्ह उत्तम महर्जन, मुकेश शाक्य, सुमन मानन्धर, रविन्सन कसाः व परमेश मल्लं सः बियादीगु खः । म्येँचालय् दुथ्याःगु म्येँया संगीत संयोजन डंगोलं हे यानादीगु खःसा उगु म्येँ आर्टोम्युज रेकर्डिब स्टुडियोय् जूगु खः ।

थनया लाय्कू नासः चुकय् जूगु ज्याझ्वलय् वरिष्ठ म्येँ हालामि जुजुकाजी रंजित, जनसंगीत श्रष्टा अमरराज शर्मा, इलोहं प्रकाशनया नरेशवीर शाक्य, यल मनपा १६ या वडाअध्यक्ष निर्मलरत्न शाक्य, संगीतकार जुगल डंगोल, आर्टोम्यूजया प्रवन्ध निर्देशक केञ्जुमा सुब्बा, चेज टेलिभिजन उत्पादक गोल्मा कम्पनीया प्रमुख सुरेश मल्ल, हिरण्यवर्ण महाविहारया आजु चित्रवीर वज्राचार्य व नेपाल घरेलु तथा साना उद्योग महासंघया पूर्व अध्यक्ष सुरेश प्रधानं मंकाः कथं म्येँचाःया पितब्वज्या यानादीगु खः ।

ज्याझ्वःया संयोजक दर्शनवीर शाक्य व यल मनपा १६ वडाअध्यक्ष शाक्यं नं नुगःखँ तयादीगु ज्याझ्वः यल मनपा १६ वडा या सह आयोजनाय् जूगु खः ।