भ्रष्टाचारया हदम्याद मंत
येँ (नेपालभाषा टाइम्स)÷संसदया राज्य व्यवस्था तथा सुशासन समितिइ विचाराधीन जुयाच्वंगु भ्रष्टाचार निवारण ऐन २०५९ संशोधन विधेयकपाखें आः भ्रष्टाचार सम्बन्धी न्यादँया हदम्याद चीकूगु दु । गृहमन्त्री रमेश लेखकं राज्य व्यवस्था तथा सुशासन समितिइ थुगु प्रावधान चीकेगु लागिं सरकार तयार दुगु जानकारी बीवं न्यादँया हदम्याद चीकेगु निर्णय जूगु खः ।
म्हिगः च्वंगु राज्य व्यवस्था तथा सुशासन समितिं सर्वसम्मत ढंगं भ्रष्टाचारया अनुसन्धानय् हदम्याद तयेगु व्यवस्थायात अस्वीकार यायेगु निर्णय याःगु खः । समितिइ दुथ्याःपिं फुक्क धइथें सांसदतय्सं हदम्याद तयेगु उचित मजूगु सुझाव बिउगु खः ।
समितिया दुजःपिंसं थःगु धापू तयेधुंकाः समितिया सभापति रामहरि खतिवडां भ्रष्टाचारया अनुसन्धानय् न्यादँया हदम्याद चीकेगु प्रस्ताव तःगु खःसा उकियात समितिया दुजःपिंसं सर्वसम्मतिं पास याःगु खः ।
भ्रष्टाचारया हदम्याद चीकेगु खँय् सर्वसम्मत निर्णय जुइधुंकाः गृहमन्त्री रमेश लेखकं सरकारयापाखें थम्हं प्रस्ताव तयागु खःसा उकियात सर्वसम्मतिं पारित याःगु जानकारी बियादीगु खः ।
भ्रष्टाचार निवारण ऐन संशोधन विधेयक २०७६ माघ ७ गते राष्ट्रियसभाय् दर्ता जूगु खः । उगु इलय् प्रधानमन्त्री केपी शर्मा ओलीं राष्ट्रियसभाय् दर्ता याःगु विधेयक २०७७ असार ८ गते पारित जूगु खः ।
राष्ट्रियसभां पारित जूगु विधेयकय् नक्कली शैक्षिक प्रमाणपत्र, घुस नःगु, राजश्व छले याःगु, गलत नियत तयाः लिखत तयार याःगु, गैरकानुनी सम्पत्ति कमे यायेगु थेंज्याःगु ज्या याःपिं सार्वजनिक पदाधिकारीतय्त अज्याःगु अपराध याःगु जानकारी दुगुयां न्यादँया दुने तक जक मुद्दा लाइगु खँ न्ह्यथनातःगु खः । लिसें पदय् बहाल जुयाच्वंगु इलय् मुद्दा मलाइगु व अवकाश लिपाया न्यादँया दुने जक मुद्दा लाइगु प्रस्ताव यानातःगु खः ।
उगु विधेयक प्रतिनिधिसभाय् वयेधुंकाः जूगु सहलहया झ्वलय् भ्रष्टाचारया अनुसन्धानय् न्यादँया हदम्याद तयेगु प्रस्ताव चीकेमाःगु सः थ्वःगु खः । सत्तापक्ष व प्रतिपक्षया फुक्कं धइथें सांसदतय्सं भ्रष्टाचारया अनुसन्धानय् हदम्याद तये मजिउ धासें संशोधन प्रस्ताव तःगु खः ।
LEAVE YOUR COMMENTS