फोहोर वायेत समस्या बञ्चरे डाँडाय् नं विरोध सुरु

येँ (नेपालभाषा टाइम्स)÷येँया फोहोर वायेगु न्हूगु ल्याण्डफिल्ड साइट कथं ल्यया तःगु नुवाकोटया बञ्चरे डाँडाया स्थानीय जनतां अन फोहोर वाके मखु धकाः सः तयाहःगु खँ सीदुगु दु ।
थौंकन्हय् फोहोर वायेगु याना तःगु नुवाकोटया हे सिसडोल ल्याण्डफिल्ड साइत फोहोरं जाया वयेवं आः न्हूगु साइत कथं बञ्चरे डाँडाय् पूर्वाधार विकास यायेमाःगु खँ पिहां वःगु खःसा थ्व खँया नापनापं स्थानीय जनतां विरोध याना हःगु खँ नं पिदंगु खः ।
सरकारं वि.सं. २०६२ सालय् हे सिसडोल लगायत बञ्चरे डाँडाया जग्गा नं अधिकरण यानाः कयातःगु खः । सिसडोलय् अल्पकालीन ढंगं जक फोहोर वायेगु व थ्वया दथुइ बञ्चरे डाँडाय् आवश्यक पूर्वाधार तयार यायेगु ज्या न्ह्याः २०६७ सालंनिसें अन हे फोहोर वायेगु धकाः योजना दयेका तःगु खः । तर सिसडोलय् फोहोर वायेगु सुरु जुइवं बञ्चरे डाँडायात पूवंका हे ल्वःमंका छ्वत । अन सरकारं १७३० रोपनी जग्गा अधिकरण याना तःगु दु । व्यवस्थित रुपं फोहोर वाये फत धाःसा थन १०० दँ तक ज्या चले याये फइगु अबले अनुमान जूगु खः । तर तत्कालिन सरकारं अन छुं हे ज्या मयाःगु कारणं थौं मार फये मालीगु अवस्था वयाच्वंगु दु ।
थौंकन्हय् फोहोर वायेगु यानाच्वंगु नुवाकोटया सिसडोलया आयु क्वचाइगु जुइवं येँय् धाःसा हानं गन फोहोर वायेगु धइगु समस्या पिहां वयेधुंकूगु दु । सिसडोलय् फोहोर वायेगु म्याद ताः ई न्ह्यः हे फूगु खःसां दथुइ म्याद थपे यानाः ज्या चले यानाच्वंगु खः । आः अन म्याद थपे याःसां नं फोहोर वायेगु थाय् हे मदुगु जुयाः न्हूगु थाय् मयासें मगाःगु खँ धाःगु दु ।
यदि बञ्चरे डाँडाय् फोहोर वायेगु खःसा आः तत्काल हे पूर्वाधार मदयेकुसें मगाः । अन पूर्वाधार दयेकेत जक हे स्वदँया ई काइगु खँ धाःगु दु । उकिं अल्पकालीन प्रयोगया लागिं जक जूसां न्हूगु थाय् ममासें मगाःगु खँ धाःगु दु । तर फोहोर वायेगु थाय् धाःसा तत्काल लुइके मफइगु जूगुलिं याकनं हे थ्व छगू तःधंगु समस्या जुयाः पिहां वयेफुगु खँ विज्ञ सूत्रतय्सं धाःगु दु ।