ने. सं. ११४४ कौलाथ्व पारू - नःलास्वनेगु

प्रमयात डिस्चार्ज लिपा नं विशेष व्यवस्था

येँ – प्रधानमन्त्री केपी ओलीयात जलस्यँ दान यानादीम्ह वय्कःया भिंचा समीक्षा संग्रौला म्हिगः अस्पताल डिस्चार्ज जुयादीसां प्रम ओलीयात धाःसा मेगु छुं न्हि अस्पतालय् तुं तइगु जूगु दु । भिंचा संग्रौलां म्हिगः अस्पतालं डिस्चार्ज जुइ न्ह्यः प्रम ओलीयात नापलानादीगु खः । जलस्यँया निक्वःगु प्रत्यारोपण लिपा प्रमयात नापलाःम्ह चिकित्सक बाहेकया न्हापांम्ह व्यक्ति संग्रौला हे खः । प्रमयात तयातःगु बेडय् हे वनाः संग्रौलां नाप लानादीगु खःसा उगु इलय् प्रमं वय्कःयात सुभाय् बियादीगु खः । थ्व बाहेक प्रम ओलीयात आः तक पार्टी व सरकारया सुं प्रतिनिधिं तकं नापलाःगु मदुनि ।

संग्रौला डिस्चार्ज जूसां प्रमयात धाःसा छुं न्हि अस्पतालय् हे तये मालीगु खँ चिकित्सकतय्सं धाःगु दु । प्रम ओली अस्पतालं डिस्चार्ज जुयादीसां वय्कःयात मेगु खुलांनिसें दछि तक कडा निगरानी यानाः तये मालीगु खँ नं चिकित्सकतय्सं धाःगु दु ।

वय्कःयात छेँय् क्वथा तकं विशेष कथं सुरक्षित जुइक व्यवस्था यानाः तइगु खँ नं धाःगु दु । वय्कःयात छुं न्हि पार्टी व सरकारया बैठकय् तकं मवनेत धाःगु दु । वय्कःया न्ह्यःने सेखं चाःपिं मनू तकं वने मजिउगु खँ नं चिकित्सकतय्सं धाःगु दु । उकिं वालुवाटारय् सुनां वय्कःयात नापलाः वंसां निश्चित दूरी तयाः जक नापलायेगु खँ ल्हायेगु ज्या जुइ धाःगु दु । पार्टीपाखें तत्काल छुं बैठक नं मतइगु खँ धाःगु दु ।