आकाशे ताँया निंतिं मनपाया अभियान

येँ – येँ महानगरपालिकां आकाशे ताँ (फ्लाइ ओभर)या प्रयोग अप्वयेकेगु निंतिं अभियान न्ह्याकूगु दु । येँ मनपां आम नागरिकयात आकाशे ताँया प्रयोग याकेगु ल्याखं छवाःयंकंया अभियान न्ह्याकूगु खः । येँ मनपां सतक दुर्घटना म्हो यायेगु व लँजुवाःतय्त जनचेतना थनेगु ल्याखं आकाशे ताँया प्रयोग याकेगु निंतिं वंगु आइतवाःनिसें उकथंया अभियान न्ह्याकूगु खः ।

लँ त्वाःल्हायेत लँजुवाःतय् सहजताया निंतिं थाय्थासय् आकाशे ताँ निर्माण यानातःसां सतक दथुं हे लँ त्वाःल्हाना बीगु व उकिं यानाः सतक दुर्घटना नं अप्वया वनाच्वंगुलिं लँजुवाःतय् सुरक्षायात ध्यानय् तयाः उकथंया अभियान न्ह्याकागु येँ मनपाया प्रवक्तालिसें १५ वडाअध्यक्ष ईश्वरमान डंगोलं कनादिल ।

येँ मनपां थुगु अभियान महानगरीय ट्राफिक प्रहरी महाशाखा व कादम्बरी मेमोरियल कलेजया समन्वयय् अभियान न्ह्याकूगु खः । येँ मनपां थुकथंया अभियान न्ह्याकूसां दक्वं थासय् आवश्यककथंया आकाशे ताँ धाःसा मदु । येँ मनपां लँजुवाःत व सवारी साधनया चाप अप्वइगु थासय् आकाशे ताँ दयेकेगु धाःसां उकियात कायान्वयन याये फयाच्वंगु अवस्था मदु ।

वंगु साउन महिनाय् येँमनपां थःगु क्षेत्राधिकार दुने लाःगु थीथी च्यागू थासय् स्थानान्तरण याये फइगु आकाशे ताँ निर्माण यायेगु धाःसां नं उकिया तयारी धाःसा आतकं जूगु खने मदुनि ।प्रवक्ता डंगोलं कनादीकथं स्वनिगलय् हे च्वना वयाच्वंपिं स्वयां नं पिनेया जिल्लां स्वनिगलय् दुहां वइपिंत लक्षित यानाः थुकथंया अभियान संचालन याःगु खः ।

ब्यस्त सतकया दथुं लँ त्वाःल्हायेबलय् दुर्घटना जुइगु सम्भावना दु धइगु सीकसीकं नं सतक त्वाःल्हायेगु बानीं यानाः दुर्घटनाया खतरा अप्वय वनाच्वंगुलिं मनपां थुकथंया अभियान न्ह्याकूगु खः ।

थुगु अभियान अन्तर्गत आकाशे ताँ गयेगु थासय् लाक्कं विद्यार्थी च्वनीगु व थुकिया निंतिं न्यय्म्ह स्वयां अप्वः विद्यार्थी परिचालित जुयाच्वंगु दु । थुगु अभियान छवाःयंकं न्हियान्हिथं न्हिनसिया २ ताःइलंनिसें प्यतात्याः ईतक संचालन जुइगु मनपाया सहरी सुशासन विभागया प्रमुख हरि कुँवरं कनादिल ।