चितवनय् प्रदेश स्तरया भाषा प्रशिक्षक तालिम

येँ (नेपालभाषा टाइम्स)- नेवाः देय् दबू बागमती प्रदेशया संयोजनय् नेवाः समाज भरतपुरया ग्वसालय् शनिवाःनिसें बागमती प्रदेश स्तरीय नेपालभाषा प्रशिक्षक प्रशिक्षण शुरु जूगु दु । प्रदेशया थीथी जिल्ला व पालिकापाखें उगु भाषा तालिमय् ब्वति कयादीगु दु । पवित्र कसाःनं प्रशिक्षण बियादीगु उगु तालिम प्यन्हु तक न्ह्याइ ।

तालिमया उलेज्या शनिवाः बागमती प्रदेशया सभामुख भुवन पाठकं यानादिल । मूपाहां सभामुख पाठकं नेपालभाषा व तामाङ भाषायात सरकारी कामकाजि भाषाया रुपय् लागू यायेगु निंतिं नियमावली दयेकेगु ज्या नं न्ह्यानाच्वंगु खँ धयादिल ।

नेवाः देय् दबू बागमती प्रदेश समितिया इन्चार्ज नापं केन्द्रीय न्वकू शान्त श्रेष्ठया सभापतित्वय् जूगु उगु ज्याझ्वलय् नेवाः देय् दबू केन्द्रया वरिष्ठ न्वकू चन्द्रलाल राजभण्डारी, मूछ्याञ्जे सत्यनारायण डंगोलपिंसं तालिम नापं नेपालभाषा व नेवाःतय्गु बारे न्ववानादीगु खः ।

ज्याझ्वलय् बागमती प्रदेशय् नेपालभाषा व तामाङभाषायात सरकारी कामकाजि भाषाया रुपय् लागू यायेगु निंतिं प्रदेश भाषा ऐन निर्माण यायेत जनस्तरं नेतृत्वदायी भूमिका निर्वाह यानादीगुलिं नेवाः देय् दबू स्वनिगः विशेष प्रदेशया नायः श्रीकृष्ण महर्जनयात हनापौ नं लःल्हाःगु खः ।