पर्यटकीय नगरी बन्दीपुरय् धुँ जात्रा

येँ(नेपालभाषा टाइम्स)÷खड्गमाई सांस्कृतिक परिवारया सक्रियताय् पर्यटकीय व सांस्कृतिक नगरी तनहुँया बन्दीपुरय् धुँ जात्रा पिथंगु दु । नेवाः कला, संस्कृतिया संरक्षण व प्रवद्र्धन यायेगु उद्देश्यं धुँ जात्रा पिथंगु खः । धुँ जात्रा पिथने स्वयां न्ह्यः आयोजक संस्थापाखें जात्रा स्वः वयेत इनाप यासें सर्वसाधारणत निमन्त्रणा याःगु खः ।

जात्राया संरक्षण यायेगु उद्देश्यं धुँ जात्रा पिथना वयाच्वनागु खड्गमाई सांस्कृतिक परिवारया छ्याञ्जे सुजन श्रेष्ठं कनादीगु दु । वय्कलं मौलिक व सांस्कृतिक परम्परा, रीतिरिवाजया संरक्षण याना तयेगु उद्देश्यं संस्थापाखें धुँ जात्रा पिथना वयाच्वनागु जानकारी बियादिल ।

संस्थाया नयः गेहेन्द्र प्रधानं बन्दीपुरय् च्वना वयाच्वंपिं नेवाःतय्सं थनया थीथी जात्राय संरक्षण यायेगु ज्याय् सक्रियता क्यना वयाच्वंगु खँ कनादिल । वय्कःयाकथं मनूतय्त दुःख बिया वयाच्वंम्ह धुँयात सिकारी स्याःगु घटनाया लिधंसाय् थीथी भावय् अभिनय यानाः थ्व प्याखं क्यनेगु याना वयाच्वंगु दु । जात्राय् धुँ, सिकारी, डाक्टर, नर्स, पहलवान व जुजुया भूमिकाय् कलाकारपिंसं अभिनय याइगु खः । जात्राय् सहभागि जुइपिं सकलें हे बन्दीया नेवाः हे जूगु नायः प्रधानं कनादिल ।

बन्दीपुर नेवाः पुचःया नायः किसान प्रधानं बन्दीपुरय् नेवाःतय्सं जात्राया संरक्षण यानातःगु जानकारी बियादिसें थुकिं यानाः पर्यटन प्रवद्र्धनय् नं तिबः जू वनाच्वंगु खँ कनादिल । करिब निसःत्या दँ न्ह्यः ख्वपपाखें बसाइ सरे जुया वःपिं नेवाःतय्सं थीथी जात्रा, पर्व, संस्कृतिया संरक्षण याना वयाच्वंगु वय्कःया धापू दु ।

थनया नेवाःत ख्वपं वःपिं जूगुलिं विशेष यानाः ख्वपय् थें हे बिस्काः जात्रायात विशेष महत्व बियाः हना वयाच्वंगु दु । बन्दीपुरया नेवाःतय्सं वि.सं.या न्हूदँया इलय् हनीगु बिस्काः जात्रा ख्वपया हे शैलीं हनेगु याना वयाच्वंगु दु । थ्व बाहेकं मेमेगु नं जात्रा, पर्ज, नखःचखः हना वयाच्वंगु दु ।

बन्दीपुरय् करिब १३४ खा छेँ नेवाः समुदायया बसोबास दया वयाच्वंगु दु । थन ख्वपं वःपिं प्रधान, पिया, श्रेष्ठ, मल्ल र जोशी समुदायया बसोबास दु । ख्वपं बन्दीपुर वःगु इलय् इमिसं थःलिसें ख्वपया हे नेवाः संस्कृतियात नं नाप दुत हःगु खः ।

थन च्वंपिं नेवाःतय्सं बिस्काः जात्रालिसें लाखे प्याखं, सापारु, धुँ जात्रा, रोपाइ जात्रा लगायत थीथी जात्रा, संस्कृति, नखःचखः हना वयाच्वंगु दु ।