क्यानेडियन नेवाः गुथि व मूछ्याञ्जे ‘लड्डटर्म सर्भिस अवार्ड’ पाखें सम्मानित
येँ(नेपालभाषा टाइम्स)÷क्यानाडाय् च्वंपिं नेवाःतय्गु संस्था क्यानेडियन नेवाः गुथि ‘लड्डटर्म सर्भिस अवार्ड–२०२१’पाखें सम्मानित जूगु दु । क्यानाडाया सिटी अफ ब्राम्प्टनं आः नकतिनि जक गुथियात उगु अवार्डपाखें सम्मान याःगु खः ।
ब्राम्प्टन सिटीया मेयर प्याट्रिक ब्राउनं क्यानेडियन नेवाः गुथिया नायः प्रकाश प्रधानयात सम्मान पत्र लःल्हानादीगु खः । क्यानेडियन नेवाः गुथिं विदेशय् च्वनाः नं नेवाः व नेपाःया संस्कृतिया संबद्र्धन, प्रवद्र्धन, समुदायमुखी थीथी ज्याझ्वः यायेगु नापं ब्राम्प्टन नगरया सांस्कृतिक विविधतायात अझ अप्वः समृद्ध यायेगु ल्याखं ताःई न्ह्यवंनिसें थीथी कथं ज्याझ्वः यानाः सक्रिय जुया वयाच्वंगु धासें उगु अवार्डं सम्मान याःगु गुथिं जानकारी बिउगु दु ।
सन् २००५ य् नीस्वंगु गुथिं थ्व वंगु झिंखुदँया दुने नेवाः संस्कृतिया न्हूदँ हनेगु, म्हपुजा यायेगु, समय्बजि नकेगु व ब्वज्या यायेगु, यःमरिपुन्हि, गुंपुन्हि हनेगुलिसें थीथी व्यक्तित्वपिनिगु बुन्हि हनेगु लगायतया ज्याझ्वः याना वयाच्वंगु दु । थुकथं हे संस्थां समुदाययात प्रत्यक्ष लबः दइकथं निःशुल्क कर आवेदन, स्वास्थ्य सम्बन्धी जनचेतनामूलक ज्याझ्वः नं याना वयाच्वंगु दु । गुथिं स्थानीय विश्वविद्यालयनाप समन्वय यानाः टोरोन्टो विश्वविद्यालयय् प्राध्यापक व अन अध्ययनरत विद्यार्थीतय्त नेवाः संस्कृति, भाषा, कला, साहित्यया प्रशिक्षण व जानकारी बीगु, ज्याझ्वः यायेगु याना वयाच्वंगु दुसा ब्रोक
विश्वविद्यालयनाप जानाः नेपाःमितय्गु आर्थिक, सामाजिक व स्वास्थ्य सम्बन्धय् अनुसन्धान यायेगु व रायर्सन विश्वविद्यालयया विद्यार्थीतय् निंतिं गुथिया बारे अध्ययन प्रतिवेदन तयार यायेगु ज्याय् ग्वाहालि याना वयाच्वंगु दु ।
गुथिपाखें स्थानीय व प्रान्तीय सरकारलिसे सहकार्य यानाः न्हूपिंत आवश्यक परामर्श व सेवा बीगु, नेवाः नसाज्वलंया प्रवद्र्धन यायेगु, परम्परागत नेवाः हुलाप्याखं, सांस्कृतिक व सांगीतिक ज्याझ्वः नं याना वयाच्वंगु दु ।
उगु हे ज्याझ्वलय् गुथिया मूछ्याञ्जे विमलमान श्रेष्ठयात सिटिजन्स अवार्ड अन्तर्गत ‘लड्डटर्म सर्भिस अवार्ड–२०२१’पाखें सम्मान याःगु दु । सिटी अफ ब्राम्प्टनपाखें सिटिजन्स अवार्ड अन्तर्गत मूछ्याञ्जे श्रेष्ठयात उगु अवार्ड लःल्हाःगु खः ।
ब्राम्पटनया मेयर ब्राउनं मूछ्याञ्जे श्रेष्ठयात उगु अवार्ड लःल्हानादीगु खः । सम्मानित श्रेष्ठ गुथिया संस्थापक दुजःलिसें सन् २००८ निसें आतकया मूछ्याञ्जे जुयाः ज्या यानाच्वनादीगु दु । सम्मानित श्रेष्ठयात थ्व स्वयां न्ह्यः क्यानेडियन डाइबिटिक एशोसियसन ग्रेटर टोरोन्टो एशियां ‘एचिभमेन्ट अवार्ड–२०१२’ पाखें नं सम्मान यायेधुंकूगु दुसा ओन्टारियो प्रान्तीय सरकारपाखें नं ‘भोलिन्टियर सर्भिस अवार्ड–२०१६’ पाखें नं सम्मान यायेधुंकूगु दु ।
LEAVE YOUR COMMENTS