सतक विस्तार विरुद्ध मंकाः प्रतिवद्धता

येँ – सरकारं यानाच्वंगु सतक विस्तार विरुद्ध थौं छगू भेला यासें मंकाः प्रतिवद्धता प्वंकीगु जूगु दु । नेपालभाषा ख्यःया नांजाःपिं हस्तीपिंसं सतक विस्तार विरुद्धया आन्दोलनय् थःपिनि मंकाः प्रतिवद्धता प्वंकेत थौं भेला यायेत्यनागु खँ उपत्यकाव्यापी सडक विस्तार पीडित संघर्ष समितिया कजि सुमन साय्मिं ‘नेपालभाषा टाइम्स’ यात कनादिल । थौं न्हिनय् ४ बजे कालिमाटीया एफटेन पार्टी भेन्युइ उगु भेला जुइ । थुकी नेपालभाषा ख्यःया हस्तीपिं शताब्दी पुरुष सत्यमोहन जोशी, नेपालभाषा मंकाः खलःया नायः पद्मरत्न तुलाधर, जनकवि दुर्गालाल श्रेष्ठ, परराष्ट्रविद् हिरण्यलाल श्रेष्ठ, नेवाः न्ह्यलुवा मल्ल के. सुन्दर, ससंफोया सहअध्यक्ष लिसें सभासद राजेन्द्र श्रेष्ठपिंसं हस्ताक्षर यानादीधुंकूगु खँ धाःगु दु ।

उकी थीथी नेवाः खलः पुचःया पदाधिकारीपिंसं नं हस्ताक्षर यानादीगु खँ नं साय्मिं कनादिल ।संघर्ष समितिं वइगु चैत १४ गते सोमवाः येँया माइतीघर मण्डलाय् वृहत् धर्ना च्वनेगु तयारी यानाच्वंगु दुसा उकिया निंतिं कालिमाटी लगायत फुक्कं सडक पीडित लागाय् च्वंपिं छेँ थुवाःया लिसें पसः बालं कयाः च्वनाच्वंपिं पसल्यातय्त नं धर्नाय् ब्वति कायेत इनाप याःगु दु ।