न्हापांगु नेवाः आइडल क्वचाल

यल(नेपालभाषा टाइम्स)- नेपालभाषा सांगीतिक ख्यःया न्हापांगु रियालिटी शो ‘नेवाः आइडल–११४३’ क्वचाःगु दु । फाल्कन इभेन्ट्स प्रा.लि.या ग्वसालय् वंगु शनिवाः थनया म्युजिक सिटीइ बिजं कासा जूगु खः ।

नेवाः आइडलया बिजं कासाय् मन्जिल शाक्य, पूर्णकुमार अवाले, सुमन शाक्य, राम महर्जन व जितेन शाक्य धेंधेंबल्लाः जूगु खः ।

बिजं कासाय् न्हापांम्ह नेवाः आइडल जुइत ताःलाःम्ह मन्जिल शाक्यं छगू लख नीन्याद्वः तकालिसे ट्रफी, दसिपौ व मेमेगु गिफ्ट ह्याम्पर ल्हातय् लाकेत ताःलाःगु दु ।
अथे हे फस्ट रनरअप जुइत ताःलाःम्ह जितेन शाक्यं न्यय्द्वःतका व दसिपौ व सेकेन्ड रनरअप जुयादीम्ह सुमन शाक्यं नीन्याद्वः तका दां व दसिपौ ल्हातय् लाकेत ताःलाःगु दु ।

न्हापांम्ह नेवाः आइडल विजेताया घोषणा नांजाःम्ह म्येँ हालामिलसें कासाया मू निर्णायक प्रवेशमान शाक्यं यानादीगु खः ।