भाषासेवी कर्माचार्यया तिथिइ सफू पितब्वज्या

येँ – भाषासेवी मदुम्ह प्रेमपूर्ण कर्माचार्यया दकिलाया पुण्य तिथि लाकाः ‘जिं म्हसिउम्ह’ नांया सफूया पितब्वज्या याःगु दु । उगु सफू अखिल नेपाल भिक्षु महासंघया संघउपनायक भिक्षु ज्ञानपूर्णिक महास्थविरं पित ब्वज्या यानाबिज्याःगु खः ।
नेपालभाषा सेवी नापं सामाजिक, सांस्कृतिक, नाट्य, शैक्षिक व बौद्धि आन्दोलनय् अग्रज ब्यक्तित्व मदुम्ह कर्माचार्यया जहान सानुमैया कर्माचार्यया सभापतित्वय् जूगु ज्याझ्वलय् थीथी व्यक्तिपिंसं वय्कलं थीथी क्षेत्रय् बियादीगु योगदानयात कयाः चर्चा यानादीगु खः । ज्याझ्वलय् वाङ्मया शताब्दी पुरुवा सत्यमोहन जोशी, नेपालभाषा परिषद्या नायः प्रा. सुवर्ण शाक्य, नेपालभाषानापं मानवअधिकारवादी न्ह्यलुवा मल्ल के. सुन्दर, अनागारिक श्रद्धाचारी, शिक्षासेवी नापं समाजसेवी हितकरवीर सिंह कंसाकार, जनकवि दुर्गालाल श्रेष्ठ, लक्ष्मण राजवंशी, गोरखापत्र संस्थानया महाप्रबन्धक बसन्तप्रकाश उपाध्याय पिंसं मदुम्ह कर्माचार्यया थीथी पक्षयात कयाः थःथःगु नुगःखँ तयादीगु खः ।

ज्याझ्वलय् विपन्न व लिउने लानाच्वंगु वर्गया मस्तय् शिक्षा, स्वास्थ्य व शीपमूलक रोजगारीया व्यवस्था नापं मेमेगु क्षेत्रय् नं ग्वाहालि यायेगु ल्याखं ‘प्रमेपूर्ण–सानुमैया असहाय सेवा कोष’ नीस्वनेगु ज्या जूगु जानकारी प्रेमसागर कर्मचार्यं बियादीगु खः । मदुम्ह कर्माचार्यया लुमन्तिइ वय्कःयात बारे थीथी व्यक्तिपिंसं च्वयादीगु च्वसु मुना सफपिथेनत ग्वाहालि यानादीपिं नेपालभाषा केन्द्रीय विभागया रास जोशी, भृगुराम श्रेष्ठ, नारायणदेवी श्रेष्ठ, सौभाग्यवती रंजितकार, डा. महेशमान श्रेष्ठ, प्रेमध्वज प्रधान, शान्तदास मानन्धर, राजेन्द्र रंजित लगायतयात सानुमैंया कर्माचार्यं मतिनाया चिं नं लःल्हानादीगु खः ।