मदुम्ह प्रेमध्वजयात लुमंकल मदनकृष्ण श्रेष्ठं

येँ – कोरोनां कयाः अस्पतालय् वासः याका च्वनादीम्ह ख्यालिजुजु मदनकृष्ण श्रेष्ठं थः विरामी जुयागु स्वयां नं नांजाःम्ह गायक प्रेमध्वज प्रधान मदयाः थःत तसकं दुःख ताःगु खँ कनादीगु दु ।

अस्पतालया बेडं हे ‘नेपालभाषा टाइम्स’ लिसे खँ ल्हासें वय्कलं धयादिल, ‘प्रेमध्वज दाइ मदयाः जितः तसकं दुःख लगे जुल । जि मफयाच्वंगु सिबें नं वय्कः मदयाः जितः तसकं दुःख ताल ।’

प्रेमध्वज मदुकुन्हु मदनकृष्णं सामाजिक सञ्जालय् छगू स्टाटस नं च्वयादीगु खः । उगु स्टाटसयात कयाः वय्कलं धयादिल, ‘व स्टाटस जिं थन अस्पतालय् च्वनाः ख्वख्वं च्वयागु खः । प्रेमध्वज दाइ मदुगु खँ न्यनाः जिं थःत ची हे मफुत । मिखां ख्वबि स्वः स्वः वयाच्वन ।’

उगु स्टाटसय् वय्कलं प्रेमध्वजया हे संगीतय् थम्हं न्हापांगु म्ये हालागु खँ च्वयादीगु खः । वि.सं. २०२६ सालय् मदनकृष्ण श्रेष्ठ न्हूम्ह हे कलाकार तिनि । दुर्गालाल श्रेष्ठं च्वयातःगु छपु म्ये प्रेमध्वज थम्हं हाले धकाः संगीत तयातःगु खः । मदनकृष्णं छगू संगीत प्रतियोगिताय् वनेत म्ये हालेगु इच्छा याःबलय् प्रेमध्वजं वय्कःयात वहे म्ये हायेकादीगु खः ।

‘स्वइत कने स्वइत क्यने, क्यने धाःसा घाः नुगः दुने दुने’ धाःगु उगु म्ये हालाः मदनकृष्ण श्रेष्ठं धेंधेंबल्लाखय् न्हापा सिरपाः त्याकादीगु खः । वयां लिपा वय्कः संगीत ख्यलय् प्रवेश जुयादिलसा लिपा स्थापित नं जुयादिल ।

भाजु श्रेष्ठं थःगु आत्मबल तसकं बल्लाःगुलिं कोरोनायात त्याकेत थः ताःलाःगु खँ नं कनादिल । थौंकन्हय् पार्किन्सन लगायत थीथी ल्वय्या यानाः न्हिं २३ क्वः वासः नये मालाच्वंगु व थ्व खनाः अस्पतालया नर्सत तकं अजूचायाच्वंगु खँ नं वय्कलं कनादिल ।