भन्तेयात हातपात याःम्ह छम्ह ज्वन
येँ (नेपालभाषा टाइम्स)÷धौख्यःया विहारय् च्वनाबिज्याइम्ह ज्याथम्ह उपसंघनायक भिक्षु गुणघोष महास्थविरयात हातपात यानाः ध्यबा लुटे याःपिं लुटेरात मध्ये छम्हेसित प्रहरीं ज्वंगु दु । झापाय् च्वनीम्ह २० दँया आदित्य श्रेष्ठयात प्रहरीं ज्वंगु खः । श्रेष्ठ सहितया पुचलं वंगु भदौ ६ गते सुथसिया ३ बजे विहारय् दुहां वनाः भिक्षु गुणघोषयात ल्हाःतुति चिनाः दायाः विहारय् च्वंगु १ लाख ६५ हजार ८९० तका दां लुटे यानाः यंकूगु खः । आः प्रहरीं वयात कुनाः मेपिंत नं मालाच्वंगु दु ।
थ्वहे झ्वलय् हातपात लिपा अस्पताल भर्ना जुयाबिज्याःम्ह भन्तेयात म्हीग अस्पतालं डिस्चार्ज यानाः येँया विश्वशान्ति विहारय् तये हःगु दु । वसपोल आः उसाँय् बांलाकेत छुं ई उगु हे बिहारय् च्वनाबिज्याइगु खँ धाःगु दु ।
LEAVE YOUR COMMENTS