‘ए प्लस’ वःपिं न्हापा स्वयां अप्वः

येँ – राष्ट्रिय परीक्षा बोर्डं एसईई २०७५ सालया लिच्वः म्हिगः सार्वजनिक यात । थुगु दँय् ३.६ निसें ४ जीपीएस हःपिं १७ हजार ५८० म्ह, ३.२ निसें ३.६ तक जीपीएस हःपिं ५१ हजार १३७ म्ह, २.८ निसे ३.२ तक जीपीएस हःपिं ६३ हजार ७४१ म्ह, २ निसे २.४ जीपीएस हःपि ९८ हजार २०७ म्ह दु । उकथं हे १.६ निसे २ जीपीएस हःपिं ९५ हजार २०७ म्ह, १.२ निसें १.६ जीपीएस हःपि ४३ हजार ८४१ म्ह दु । लिच्वः चित्त बुझे मजूसा न्यासः तका पुलाः पुनर्योग याये फइगु व उकिया लागिं झिंन्यान्हुया दुने निवेदन बी फइगु खँ धाःगु दु ।

अथे हे निगू विषय तक ‘सी’ वा व स्वयां क्वय्या ग्रेड वल धाःसा पूरक ग्रेडवृद्धि परीक्षाय् ब्वति कायेफइगु खँ नं परीक्षा नियन्त्रण कार्यालयं धाःगु दु । कार्यालयया कथं एसईई परीक्षाय् ५० म्ह विद्यार्थीया लिच्वः रद्द जूगु दु । निम्ह विद्यार्थीया फुक्कं विषयया लिच्वः रद्द जूगु दुसा पीच्याम्ह विद्यार्थीया छगू जक विषयया लिच्वः जक रद्द जूगु दु । मेगु थीथी कारणं लिच्वः वयेमफुपिं विद्यार्थीया हकय् सम्बन्धित विद्यालय व विद्यार्थीं परीक्षा नियन्त्रण कार्यालयय् स्वापू तयेफइगु खँ नं परीक्षा नियन्त्रण कार्यालयं धाःगु दु । गुलिखे विद्यार्थीया सिम्बोल नम्बर अस्पष्ट जूगुलिं नं लिच्वः पिहां मवःगु दु ।

उकथं हे विद्यार्थीया प्रयोगात्मक परीक्षाया नम्बर मवःगुलिं नं लिच्वः पिथनेत समस्या जूगु दुसा गुलिखे विद्यार्थीया क्वःछिनातःगु उमेर मगाःगुलिं नं लिच्वः मवःगु खँ परीक्षा नियन्त्रण कार्यालयं धाःगु दु । थीथी कारणं लिच्वः पिहां मवःपिं परीक्षार्थीतय्सं परीक्षा नियन्त्रण कार्यालयय् स्वापू तयेत धाःगु दु ।

थुगु दँय् एसईई परीक्षाय् साधारणपाखे ४ लाख ४९ हजार ६४२ म्ह व प्राविधिकपाखे ९ हजार ६३३ म्ह परीक्षार्थी सहभागी जूगु खः । परीक्षार्थी मध्ये २ लाख ३६ हजार ४४५ म्ह छात्र व २ लाख ३८ हजार ५५८ छात्रां ब्वति काःगु खः । २०७५ सालया एसईई परीक्षा वंगु चैत १० गतेनिसें २१ गते तक न्ह्याःगु खः ।

निम्हं सेलिब्रेटीत पास
एसईई परीक्षा बिउपिं निम्ह नांजाःपिं व्यक्तित्वपिं कलाकार करिष्मा मानन्धर व सांसद शान्ता चौधरी नं निम्हं पास जूगु दु । कलाकार मानन्धर ‘बी प्लस’ हयाः पास जूगु खःसा सांसद चौधरी ‘बी’ ग्रेड हयाः पास जूगु खः ।
लिच्वः लिपा मानन्धरं आः थः मेनेजमेन्ट कयाः प्लस टू ब्वनेगु खँ कनादीगु दु । सांसद चौधरीं धाःसा तत्कालया लागिं थः ‘औंठा छाप’ धइगु उपाधिपाखें मुक्त जूगु प्रतिक्रिया बिसें उच्च शिक्षाया अध्ययन नं न्ह्याकेगु खँ कनादीगु दु ।