डा. मानन्धरयात पञ्चवीर सिरपाः बीगु

येँ – बु सं २५६२ या पंचवीर सिरपाः च्वमि डा. त्रिरत्न मानन्धरयात बीगु जूगु दु । युवा बौद्ध समूहया नायः मदनबहादुर तुलाधरया अध्यक्षताय् दाता पञ्चवीर सिंह तुलाधरया उपस्थितिइ जूगु मुँज्यां च्वमि मानन्धरया ‘धर्म गुबलय् यायेगु’ च्वसुया निंतिं थुगु सिरपाः बीगु क्वःछिउगु खः । निर्णायक समितिया च्वमि लोचनतारा तुलाधर व बौद्ध विद्वान मदन रत्न मानन्धरं च्वसुया मूल्यांकन यानादीगु खः ।

युवा बौद्ध समूहं नेपालभाषा टाइम्स न्हिपतिइ दछि यंकं पिहांवःगु बौद्ध च्वसुया मध्यये ल्ययाः छम्हेसित थ्व सिरपाः बीगु खः । बु.सं. २५६२ इ नेपालभाषा टाइम्स ५८ पु बौद्ध च्वसु पिहां वःगु खः ।