बेल्जियमं लिहांवःम्ह मिसायात कोरोना संक्रमण

येँ – स्वनिगलं पिने हानं मेम्ह छम्हेसित कोराेना भाइरसया संक्रमण जूगु दु । बेल्जियमं नेपाः लिहांवःम्ह बाग्लुङया २२दँया मिसायत संक्रमण जूगु खः । उम्ह मिसा चैत ४ गते कतार एयरवेजया ‘क्यूआर ६५२’ फ्लाइटं नेपाः वःगु खः । वहे विमानय् च्वनावम्ह १९दँया मिसायात थ्वस्वयां न्ह्यः हे कोरोना संक्रमण जूगु खः । ‘क्यूआर ६५२’ फ्लाइट कतारया दाेहा जुयाः चैत ४ गते येँ वःगु खः । उगु विमानय् १५८म्ह यात्रुत दुगु खः । बेल्जियमं कतारया दाेहा जुयाः येँ थ्यंकूम्ह बाग्लुङया उम्ह मिसा थन वःगु कन्हय् कुन्हु माइक्राे गयाः छेँ वंगु खः । छेँय् वःगु निन्हु-स्वन्हु लिपा ज्वर वयेवं धाैलागिरी अञ्चल अस्पतालय् वासः याकेत वंगु खः । थ्व नापं नेपालय् काेराेना संक्रमिततय् ल्याः न्याम्ह थ्यंगु दु ।

(ने. सं. ११४० चौलाथ्व ४ / वि. सं २०७६ चैत १५, शनिवाः)