ने. सं. ११४४ ञलाथ्व नवमी -

मिसा खलःपाखें थीथी सिरपाः व सम्मान

येँ (नेपालभाषा टाइम्स)- नेपालभाषा मिसा खलःया स्वीन्यादँ बुन्हिया लसताय् म्हिगः थीथी व्यक्तियात सिरपाः व सम्मान लःल्हायेगु ज्या जुल । नांजाःम्ह पर्यटन व्यवसायी लिसें संरक्षणविद् कर्ण शाक्य मू पाहां कथं झाःगु उगु ज्याझ्वलय् ज्याथम्ह साहित्यकार फणीन्द्र वज्राचार्य, भाषा आयोगया दुजः सुरेश मानन्धर, स्वर्ण पदक विजेता कासामि केदारेश्वरमान स्थापित, थँजिम्ह आजिवन जः जलेश्वरी श्रेष्ठ व निवर्तमान नायः मंगला कारंजितयात सम्मान याःगु खः । अथे हे कमला लुमिन नेपालभाषा हःपाः सिरपाः दाता कमला लुमिन कुमारं च्वमि भवानी तुलाधरयात व रमा–कौशल्या लुमंति सिरपाः दाता मथुरा साय्मिं सिस्टर बिकुमाया कारंजित श्रेष्ठयात लःल्हानादीगु खः ।

ज्याझ्वलय् नुगःखँ प्वंकादिसें मूपाहां कर्ण शाक्यं नेवाः मिसापिंके नं अथाह शक्ति सुलाच्वंगु दु धासें थः मां व जहानपाखें प्राप्त जूगु प्रेरणाया प्रशंग कनादिल । लिसें वय्कलं ७५ दँया वैंशय् थःगु व्यवसाय फुक्क काय् म्ह्याय्पिंत त्वःताः थः न्हूगु चिन्तनय् लगे जुयागु व माल धाःसा उमेर वंसां नं ज्या यायेफु धइगु प्रेरणाया खँ नं कनादिल ।

ज्याथम्ह साहित्यकार फणीन्द्ररत्न वज्राचार्यं नेपालभाषा मिसा खलः मिसापिनि संस्था खःसां थः मिजंम्ह मनूयात नं हंगुलिं लसता प्वंकादिल । ज्याझ्वलय् नेवाः देय् दबूया नायः पवित्र वज्राचार्य, श्रद्धाचारी गुरुमां, मिसा खलःया पुलांम्ह नायः सुवर्णकेशरी चित्रकारपिंसं नं न्ववानादीगु खः ।

मिसा खलःया नायः धर्मशोभा तुलाधरया सभापतित्वय् जूगु उगु ज्याझ्वलय् मिसा खलःयात परन्तु तक धिसिलाक्क न्ह्याका तयेगु लागिं छगू कोश नीस्वनेगु घोषणा यासें ज्याझ्वलय् उपस्थित दुजःपिंसं अन हे ग्वाहालि दां नं लःल्हाःगु खः ।