संक्रमिततय् ल्याः १८ हजारं च्वय्
येँ (नेपालभाषा टाइम्स) – नेपालय् कोरोनां संक्रमण जूपिनि ल्याः १८ हजार स्वयां अप्वः थ्यंगु दु । म्हिगः थप सछिम्हेसित कोरोना पुष्टि जुइवं नेपालय् संक्रमिततय् ल्याः १८ हजार ७४ म्ह थ्यंगु खः । अथेहे संक्रमणं यानाः म्हिगः थप निम्हेसिया ज्यान वंगु दु । थुकिया लिसें नेपालय् कोरोना संक्रमणं सीपिनि ल्याः ४२ म्ह थ्यंगु दु । सीपिं मध्ये छम्ह धनुषाय् ६० दँ दुम्ह मिजं व छम्ह चिनियाँ नागरिक खः ।
म्हिगः सीम्ह धनुषाया मिजंयात उच्च ज्वरो, सेखं, सासः ल्हायेत थाकुइवं साउन २ गते धरानया बीपी कोइराला स्वास्थ्य विज्ञान प्रतिस्थानय् भ्यान्टिलेटरय् तयाः उपचार यानाच्वंगु खः । म्हिगः कोरोना संक्रमण जूपिं मध्ये स्वम्ह स्वनिगःयापिं लाःगु दु । म्हिगः थप जूपिं स्वम्हं येँयापिं जूगु
खँ धाःगु दु । म्हीग नं येँय् गुम्हेसिके संक्रमण खनेदुगु खः ।
म्हीग येँय् च्याम्ह व यलय् छम्हेसिके संक्रमण खनेदुगु खः । स्वास्थ्य मन्त्रालयं बिउगु जानकारी कथं बुधवाः तकया दुने देय् न्यंकं २० हजार ८०० म्ह क्वारेन्टाइनय् तयातःगु दु ।
कोरोनां चिनियाँ नागरिक मंत
येँ (नेपालभाषा टाइम्स) – नेपालय् कोरोना भाइरसं न्हापांखुसी छम्ह विदेशी सीगु दु । म्हिगः शिक्षण अस्पताल महाराजगंजय् छम्ह चिनियाँ नागरिक कोरोना भाइरसया कारणं सीगु खः । दछि न्ह्यव निसें पोखराय् च्वनाच्वंम्ह ४९ दँया उम्ह मिसायात मंगलवाः निसें आइसियुलय् तयाः उपचार यानातःगु खःसां बुधवाः सुथय् सीगु खः । पोखराय् व्यापार यानाच्वंम्ह उम्ह मिसा नुगःचु व जलास्येँया ल्वगि जूगु खँ धाःगु दु । नुगःचु व जलास्येँया ल्वय् दुगुलिं पोखराया मणिपाल अस्पतालय् वासः याकाच्वंम्ह वयात छुं न्हि न्ह्यव हेलिकप्टरं ग्राण्डी अस्पतालय् हःगु खः ।
ग्राण्डीइ कोरोना परीक्षण यानास्वःबलय् पोजिटिभ खने दयेवं टिचिङ्ग अस्पतालय् रिफर यानाछ्वःगु खः । थन हे उम्ह चिनियाँ नागरिकया मृत्यु जूगु खः । थुकिया लिसें नेपालय् कोरोना संक्रमणं सीपिनि ल्याः ४२ म्ह थ्यंगु दु ।
LEAVE YOUR COMMENTS