गठबन्धनय् असन्तोष, येँया कांग्रेस कार्यकर्तात रुष्ट

येँ – सरकारय् दुथ्याःगु न्यागू दल दथुइ गठबन्धन यानाः चुनाव ल्वायेगु धकाः सहमति जूसां मैदानय् धाःसा सहमति कायम यायेत थाकुइगु अवस्था पिहां वःगु दु । देय्या थीथी नगरय् तालमेलया समस्या पिहां वःथें राजधानी येँय् नं अज्याःगु हे समस्या पिहां वइगु संकेत खने दया वःगु दु ।

सूत्रतय्सं धाःकथं येँ महानगरपालिकाया स्वंगू वडा नेकपा (एस) यात बीगु सहमति जुइवं स्थानीय कांग्रेस कार्यकर्तात तम्वःगु खँ सीदुगु दु । येँया वडा २४ य् उकुन्हु तिनि एमाले त्वःताः नेकपा (एस) य् वःम्ह बालकृष्ण श्रेष्ठयात हे टिकट बीगु जुइवं अनया कांग्रेस कार्यकर्तात तम्वःगु दु । अथे हे वडा १० नं एसयात बीगु जुइवं अन नं कांग्रेस कार्यकर्तात तम्वःगु दु । वडा १० कांग्रेसं त्याका तःगु वडा खः ।

अथे हे येँया मेयर पदय् नेता प्रकाश मान सिंहया कलाःयात थनीगु चर्चा जुइवं टिकटया आकांक्षी जुयादीम्ह वर्तमान उपमेयर हरिप्रभा खड्गी श्रेष्ठ रुष्ट जुयादीगु खँ सीदुगु दु ।

उपमेयरय् धाःसा नेकपा (एस) यात त्वःतेगु तयारी दुसां उम्मेदवार सु जुइ धइगु निश्चित मजूनि । सूत्रतय्सं धाःकथं उपमेयरय् नेकपा (एस) पाखें ईश्वरमान डंगोल व रामेश्वर श्रेष्ठया नां वयाच्वंगु दु । तर निश्चित मयाःनि । कांग्रेसपाखें सुसन वैद्य उपमेयरय् दनीगु चर्चा जुयाच्वंगु दु ।

कांग्रेसपाखें मेयरया उम्मेदवार कथं शहरी विकासविद् आई.एल. सिंहया नां चर्चाय् दु । टिकट वइगु चर्चा जुइवं भाजु सिंह नं जन सम्पर्क अप्वयेकेगु लागिं मनू नापलायेगु ज्याय् ब्वाँय् जुयाच्वंगु खँ सीदुगु दु ।

उखे एमालेया येँ जिल्ला कमिटीं मेयर पदया उम्मेदवार कथं प्यम्ह मनूया नां सिफारिस यानाः केन्द्रय् छ्वःगु खँ सीदुगु दु । उकी वर्तमान मेयर विद्यासुन्दर शाक्य व पुलांम्ह मेयर केशव स्थापितया नां नं दुथ्याः । सिफारिसय् मेपिनि नं नां दुसां मू प्रतिस्पर्धा धाःसा विद्यासुन्दर शाक्य व केशव स्थापितया दथुइ हे जुइगु खँ धाःसा पार्टीं थुगुसी छक्वः आः जुयाच्वंपिंत हे लिसा कयाः टिकट बीगु तयारी यानाच्वंगु खँ सूत्रं धाःगु दु ।

चुनावया तयारी कथं एमालें याकनं हे थःपिनि चुनावी घोषणापत्र नं सार्वजनिक यायेगु तयारी यानाच्वंगु खँ सीदुगु दु ।

सम्बन्धित बुखँ

LEAVE YOUR COMMENTS