ने. सं. ११४४ कछलागा पञ्चमी -

सरकारी ज्याखँय् नेपाल संवत् – ‘आन्दोलनया उपलब्धी’

येँ (नेपालभाषा टाइम्स)- सरकारी ज्याखँय् नेपाल संवत् नं छ्यला यंकेगु धकाः नेपाल सरकारं याःगु निर्णययात थ्व संवत्या आन्दोलनय् सक्रिय न्ह्यलुवातय्सं तःधंगु उपलब्धी खः धकाः लसकुस याःगु दु ।

नेपाल संवत् आन्दोलनया न्ह्यलुवातय्सं थ्व निर्णयया लागिं प्रधानमन्त्री पुष्पकमल दाहालया सरकारयात सुभाय् देछासें आः थुकियात क्वातुक कार्यान्वयन याना यंकेमाःगु खँय् बः बिउगु दु ।

सरकारं याःगु थ्व निर्णय राजपत्रय् प्रकाशित मजूतले कार्यान्वयनय् वनी मखुनि । उकिं आः राजपत्रय् प्रकाशित जुइबलय् उकी गज्याःगु भाषा छ्यला तइ व प्रयोगया सवालय् छु गज्याःगु खँ धयातइ धकाः स्वये मानिगु खँ धाःगु दु । गबलें गबलें सरकारं निर्णय याःसां नं कर्मचारीतय्सं उकियात मेगु हे अर्थ पिहां वइकथं न्ह्यःने यंका बीगु जुइयः । थ्व स्वयां न्ह्यः वर्तमान प्रधानमन्त्री पुष्पकमल दाहाल हे सरकारय् दुगु इलय् नेपाल संवत्यात ‘राष्ट्रिय मान्यता’ बीगु जुल धकाः सरकारं निर्णय याःगु खः । तर उगु निर्णय राजपत्रय् धाःसा प्रकाशित मजू ।

राजपत्रय् प्रकाशित मजूगु कारणं उगु निर्णयया आधिकारिकता पुष्टि मजूगु खँ विज्ञ सूत्रं धाःगु दु । आः सरकारी ज्याखँय् छ्यलेगु धकाः मन्त्रिपरिषदं निर्णय याःसां उकिया पूरक अर्थ धाःसा राजपत्रय् प्रकाशित जुइधुंकाः तिनि स्पष्ट जुइगु खँ धाःगु दु ।

अथे हे कर्मचारी सूत्रं धाःकथं नेपाल सरकारं निर्णय यायेसातकि उकियात कार्यान्वयन यायेत धाःसा अझं छुं ई काइगु खनेदु । सरकारं याःगु निर्णय छु छु तह तक कार्यान्वयन यायेगु धइगु खँ स्पष्ट याये मानिगु अवस्था दु । संघीय सरकारं याःगु थ्व निर्णय प्रदेश व स्थानीय सरकारतय्सं पालना यायेमाः लाकि म्वाः धइगु खँ पिहां वइ तिनि । लिसें निर्णय कार्यान्वयन याकेत थीथी मन्त्रालय व विभागय् परिपत्र याये मानिगु आवश्यक जुइ ।

सरकारपाखें याइगु थज्याःगु फुक्कं प्रक्रियायात सतिक च्वनाः स्वये माःगु व आवश्यक जूथाय् घ्वायेमाःगु ज्या नं आः संवत् अभियन्तातय्सं यायेमाःगु खँ धाःगु दु ।

थिमिइ प्रयोग शुरु
नेपाल संवत् सरकारी ज्याखँय् छ्यलेगु सरकारया निर्णय नापनापं मध्यपुर थिमि नगरपालिकाया वडा नं. ८ य् नेपाल संवत् छ्यलेगु निर्णय याःगु दु । आः उगु वडापाखें याइगु हरेक ज्याखँय् विक्रम संवत्या नापनापं नेपाल संवत् नं छ्यलेगु निर्णय वडां याःगु खः ।