स्वंगू सफू विमोचन

येँ (नेपालभाषा टाइम्स)- विश्व कविता दिवसया लसताय् स्वंगू सफू विमोचन जूगु दु । गाजलं दाःगु चा, चिन्तनया लँय् जि व अमुलिइ प्यकालँय् जि जि नांया सफू विमोचन जूगु खः । नेपालभाषा केन्द्रीय विभागया प्रमुख डा. राजन लाल जोशी, प्राज्ञ ध्रुव मधिकर्मी व साहित्यकार पूर्ण ताम्रकारं मंकाः कथं सफू विमोचन यानादीगु खः । खुगू दसक न्ह्यः नं प्रकाशनय् वयेधुंकूगु डा. आनन्द जोशी व विमल ताम्रकारं सम्पादन याःगु ‘गाजलं दाःगु चा’या निगूगु संस्करण पिदंगु खः ।

ज्याझ्वलय् न्ववासें डा. आनन्द जोशीं नेपालभाषाया साहित्यया अवस्थाप्रति चिन्ता प्वंकादिल । ‘नेपालभाषाया साहित्य दक्षिण एशियाया हे उत्कृष्ट साहित्य मध्ये छगू खः । दसकौं न्ह्यः हे थीथी विधाय् च्वयेगु सुरु जुइधुंकूगु साहित्ययास्तर न्हिन्हिथं बांमलाना वनेगु बांलाःगु विषय मखु’, धयादिसें वय्कलं साहित्ययात व्यावसायिक यानाः स्तरबृद्धि यायेमाःगु खँय् बः बियादिल ।

रुवरिक व कुतः पिकाकको आयोजनाय् जूगु ज्याझ्वलय् गायक सत्यनारायण मानन्धरं नेपालभाषा साहित्यया आदिकवि महिन्द्र मल्लं रचना याःगु कवितायात म्येँ कथं न्यंकादीगु खः ।