‘बालेनो’ गाडीया नां हिलाः ‘बालेन’ याइम्ह सल्लाहकार

येँ (नेपालभाषा टाइम्स)÷ येँ महानगरपालिकाया मेयरय् बालेन शाह त्याना वयेवं येँया नां हे स्यंकाः ‘बालेन सिटी’ धाइपिनि जगजगी जुयाच्वंगु दु । थ्वहे झ्वलय् मेयर शाहया सल्लाहकार जुयाच्वंम्ह छम्हेसिनं ला कानुनविपरीत गाडीया नां हे हिलाः ‘बालेन’ धकाः तयाबिउगु दु ।

मेयर शाहया पूर्वाधार सल्लाहकार जुयाच्वंम्ह सुनिल लम्सालं थम्हं गया वयाच्वंगु महानगरपालिकाया गाडीया नां हिलाबिउगु खः । लम्सालं बा. २ झ २७२९ नं.या सुजुकी कम्पनीया ‘बालेनो’ गाडी गया वयाच्वंगु खः । थ्व गाडी न्हापा पुलांम्ह मेयर विद्या सुन्दर शाक्यं गया वयाच्वंगु खः । उगु गाडीया लिउने अंग्रेजीं ‘बिएएलइएनओ’ (बालेनो) धकाः च्वयातःगु आखःग्वः या ‘ओ’ आखः चीकाः आः ‘बालेन’ जक याना बिउगु खः । थथे गाडीया नां हे हिलेगु धाःसा कानुन विपरीत जुइगु खँ धाःगु दु ।

सवारी तथा यातायात व्यवस्था ऐन २०४९ कथं गाडीइ छुं नं कथंया हिउपाः हयेमाःसा यातायात व्यवस्था विभागया स्वीकृति कायेमाः । स्वीकृति मकायेकं गाडीया रंग, स्वरुप छुं नं हिले मजिउ । अथेहे सवारी निर्माण कम्पनीं दयेकाहःगु सवारीया बनोट सम्बन्धय् निर्धारण यानातःगु स्पेसिफिकेनय् छुं हिउपाः हये मदइगु कानुनय् स्पष्ट उल्लेख जुयाच्वंगु दु, तर लम्सालं धाःसा सरकारी गाडीया नां हे हिलाबिउगु खः ।

कानुनविद्तय् कथं गाडीया नां ला झन हिले मजिउ । गाडीया नां हिल धाःसा ला गाडी कम्पनीं तकं मुद्दा तयेफु ।

नेपालभाषा टाइम्स

च्वमिया मेमेगु

• ज्यापु दिवसया लसताय् सुकुन्दा र्‍याली
• मस्तय् अनलाइन जोखिमपाखें सुरक्षित यायेत सरकार प्रतिबद्ध
• ‘आः विमान न्यायेत फुक्क हे ग्याइगु जुल’
• नेवाः हना सिरपाः लःल्हात
• एनपिएलय् न्हापांगु शतक, पोखरा व कर्णाली त्यात