हिदान सम्बन्धी जागरण म्येँ

येँ – हिदान सम्बन्धी जनचेतना अभिवृद्धि यायेगु ल्याखं छपु म्येँ पिहां वःगु दु । नेपाल स्वयंसेवी रक्तदाता समाजं उगु म्येँ पित हःगु खः ।

थनया बागबजाःस्थित होटल हार्दिकय् जूगु छगू ज्याझ्वःया दथुइ ‘अठार वर्ष पैतालिस किलो, रक्तदान गर्न नगरौ ढिलो’ धइगु हिदानसम्बन्धी जागरण म्येँया पितब्वज्या याःगु खः ।
समाजया केन्द्रीय अध्यक्ष पे्रमसागर कर्माचार्यं च्वयादीगु म्येँय् यमन श्रेष्ठ व निशा देसारं सः बियादीगु खःसा यमन श्रेष्ठं लसय् हनादीगु खः । मनोहर सुनामं संगीत संयोजन यानादीगु म्येँय् सुष्मा लिम्बु व दीप तामाङं नं सः बियादीगु दु ।

समाजया केन्द्रीय अध्यक्ष कर्माचार्यं म्येँया पितब्वज्या यानादीगु ज्याझ्वलय् समाजया २० वडा कमिटीपाखें तयार याःगु नेस्वरस स्वयंसेवी ज्याकेट नं समाजया दुजःपिंत लःल्हानादीगु खः ।
राष्ट्रिय जनस्वास्थ्य प्रयोगशालाया निर्देशक डा. रुणा झा विशेष पाहांकथं झायादीगु खःसा नेपाल रेडक्रस सोसाइटीया पुलांम्ह महामन्त्री देवरत्न धाख्वा, रिलायन्स फाइनान्सया प्रमुख कार्यकारी अनिल श्रेष्ठ, स्वास्थ्य सेवा विभाग नेपाल रेडक्रस सोसाइटीया निर्देशक डा. मनिता राजकर्णिकार पाहांकथं झायादीगु खः ।

समाजया केन्द्रीय अध्यक्ष कर्माचार्यया सभापतित्वय् जूगु ज्याझ्वलय् म्येँ पिथनेत थीथीकथं ग्वाहालि यानादीपिंत सुभाय् पौ नं लःल्हाःगु खः ।

सम्बन्धित बुखँ

LEAVE YOUR COMMENTS