नेपालभाषा मचा चिनाखँ कासा जुइगु

येँ – थुगुसी मोहनि नखःया इलय् मस्तय् दथुइ नेपालभाषा चिनाखँ कासा जुइगु जूगु दु । ग्लोबल नेपाः नेटवर्क व नेवाः एचडी टेलिभिजनया मंकाः ग्वसालय् थुगुसी मोहनिया लसताय् लाकाः उकथं मस्तय् दथुइ चिनाखँ कासा जुइत्यंगु खः । मस्तय्त भाषा, कला, साहित्य व संस्कृतिया महत्व थुइके बीगु उद्देश्यं उगु ज्याझ्वः यायेत्यंगु खः ।

उगु चिनाखँ कासाय् विश्वन्यंकंया १३ दँ क्वय्यापिं मस्तय्सं ब्वति काये फइगु खँ ग्वसाः खलकं जानकारी बिउगु दु । ज्याझ्वलय् ब्वति कायेत मस्तय्सं चिनाखँ वाचन यानाच्वंगु भिडियो कयाः ग्वसाः खलःयात छ्वया हयेमाःगु व्यवस्था यानातःगु दुसा उकथं कयातःगु भिडियो वइगु सेप्टेम्बर ३० तारिख तकया दुने छ्वया हयेत नं ग्वसाः खलकं इनाप याःगु दु ।

मचा चिनाखँ कासाय् ब्वति काइपिं मस्तय्सं नेवाः संस्कृति पिज्वइकथंया वसतय् नेपालभाषाया ३० निसें ९० खँग्वः तकया दुने चिनाखँ वाचन याये फइगु ग्वसाः खलकं धाःगु दु । कासाय् न्हाप जूम्हेसित नीद्वः, लिउ लाःम्हेसित झिंन्याद्वः, लियांलिउयात झिद्वः व सामाजिक संजालय् दकलय् अप्वः लाइक व मोस्ट पपुलर भ्युअर्सयात झिद्वः व युट्युबय् सब्सक्राइब व मोस्ट पपुलर भ्यूयात झिद्वः तका सिरपाः बी ।