प्यान नम्बरं कवाडीयात संकट

मी मफयाः छेँय् छेँय् कवाडी काः वइगु बन्द

येँ – द्वःछि तका स्वयां अप्वः ध्यबाया कारोबार यायेगु निंतिं समेत प्यान नम्बर अनिवार्य जुइमाः धइगु व्यवस्था सरकारं यायेवं कवाडी ज्या याइपिंत समेत तःधंगु समस्या जूगु दु । थुकिया लिच्वः कथं थौंकन्हय् छेँय् छेँय् वयाः ‘खाली बोटल, पुराना कागज’ न्याः वइपिं हे बन्द जूगु दु ।

अथे छेँय् छेँय् कवाडी सामान न्याना यंकीपिंसं वहे सामान कवाडी संकलन केन्द्रय् मीमाल धाःसा थःगु प्यान नम्बर समेत क्यने माःगु जुयाः उमित समस्या जुयाच्वंगु खँ सीदुगु दु । कवाडी संकलन केन्द्रय् सामान मियाः द्वःछि तका स्वयां अप्वः ध्यबा काये माल धाःसा प्यान नम्बर क्यनेमाःगु व्यवस्था दु ।

कवाडी संकलकतय्सं कवाडी सामान कायेगु बन्द यायेवं थौंकन्हय् येँया थीथी रेष्टुरेन्ट व होटेलय् बियर, अयलाःया सिसी, भ्वंया बाकस आदि थाति लानाच्वंगु दु । न्हापा छगः बियर बोटलया स्वतकां मीगु यानाच्वंपिं रेष्टुरेन्ट व होटलत आः कवाडी सामान काइपिं मवयेवं सिसी तयेगु थाय् मदयाः समस्याय् लानाच्वंगु खँ सीदुगु दु ।

थुकिं यानाः व्यवसायीतय्त छखे सिसी तयेत थाकुयाच्वंगु दुसा मेखे छुं भचा जुयाच्वंगु आम्दानी नं म्हो जूगु दु । रेष्टुरेन्ट व होटल व्यवसायीया लागिं बियर, अयलाः व भ्वंया बाकस नं छगू खनेमदुगु आम्दानी जुयाच्वंगु दु । कवाडीतय्सं आः बियर, अयलाःया खाली सिसी व भ्वंया बाकस काःमवयेवं थुकिया व्यवस्थापन गुकथं यायेगु धइगु हे समस्या जुयाच्वंगु खँ नं व्यवसायीतय्सं धाःगु दु ।

मेखे थ्वहे कारणं यानाः कवाडी संकलन याइगु संकलन केन्द्रत नं बन्द जुयाच्वंगु दु । कवाडी संकलन केन्द्रं येँ महानगरपालिकायात कवाडी कर पुलेगु यानाच्वंसां संकलकतय्सं प्यान नम्बर कयामतःगुलिं सामान न्याये मफयाः केन्द्र बन्द याये मालाच्वंगु खँ धाःगु दु ।

कवाडी संकलकं प्यान काये फइ मखु
कवाडीया सामान काः वइपिंत नं प्यान नम्बर अनिवार्य याःसां उमिसं प्यान काये फइगु अवस्था धाःसा मदु । छेँय् छेँय् खाली बोटल काः वइपिं अधिकांश कवाडी संकलकत भारतीय नागरिक खःसा भारतीय नागरिकं नेपालय् प्यान नम्बर काये फइ मखु । नेपाली हे नागरिक खःसां अधिकांश कवाडी संकलकतय्के नेपाली नागरिकता मदु ।

उकिं नं उमिसं प्यान नम्बर काये फइगु अवस्था मदु । थ्व कारणं यानाः थ्व कवाडी संकलकतय्सं चाहे जुयाः नं प्यान नम्बर काये मफइगु खँ धाःगु दु । थज्याःगु समस्या मेमेगु चीधंगु व्यवसाय याइपिंत नं जुयाच्वंगु खँ सीदुगु दु ।