ने. सं. ११४६ अनलाथ्व पुन्हि -

स्वनिगलय् कोरोना : ५म्ह संक्रमितत गन गन च्वंपिं खः ?

येँ – कोरोना भाइरसपाखें मंगलवाः थप २७म्ह मनूत संक्रमित जुल । उकी मध्ये येँ ३म्ह व यल व ख्वपय् छम्ह-छम्हेसित संक्रमण जूगु पुष्टि स्वास्थ्य तथा जनसंख्या मन्त्रालयं याःगु दु ।

थौं संक्रमित जुम्ह मध्ये छम्ह येँया वडा नम्बर ९ सिनामंगलया कालिमाटी डोल धाःगु थासय् च्वनीम्ह मिजं खः । स्थायी छेँ रौतहट खःसां सिनामंगलय् बांलच्वनाच्वंम्ह खः । मजदुरी ज्या यानाच्वम्ह उम्ह संक्रमित वैशाख १४-१५ गते पाखे रौतहटय् वंगु व वैशाख २६ गते थः म्ह्याय्यात कयाः येँ लिहांवःगु खः ।

उगु वडाया अध्यक्ष रामकृष्ण जयखु श्रेष्ठं उम्ह संक्रमितयात सोमवाः हे एम्बुलेन्सय् तयाः टेकु अस्पताल भर्ना यायेगु ज्या जूगु धयादिल । अथेहे संक्रमित नापं च्वंपिं ९म्हेसिया आरडीटी विधिपाखें परीक्षण जूगु व फुक्कसिया लिच्वः नेगेटिभ वःगु खँ वडा अध्यक्ष श्रेष्ठं नेपालभाषा टाइम्सयात कनादिल । नापं छुं दिं लिपा ९म्हेसित पीसीआर विधिपाखें नं परीक्षण जुइगु धयादिल ।

अथेहे मेम्ह संक्रमित येँया वडा नम्बर २८ बागबजारय् च्वंगु बुद्ध बिहार ल्यनूे च्वनीम्ह खः । बगबजाःया हे प्रेसया थुवाः उम्ह मनू वैशाख २८ गते जक धादिङं येँ वःम्ह खः । संक्रमित मनू नापं वम्ह मेम्ह पासाया परीक्षणया लिच्वः धाःसा नेगेटिभ वःगु खँ उगु वडाया अध्यक्ष भाइराम खड्गीं धयादिल ।

वडा अध्यक्ष खड्गीया कथं आः उम्ह मनूनाप सम्पर्कय् वःपिं मनूत मालेगु ज्या जुयाच्वंगु धयादिसें संक्रमित मनू च्वनाच्वंगु लागाय् दुपिं मनूतय् परीक्षण यायेगु तयारी जुयाच्वंगु धयादिल । अथेहे येँ संक्रमण जुम्ह मेम्ह छम्हेसिया धाःसा पहिचान जुइमफुनी ।

यलया संक्रमित धाःसा कोरोनाया कन्ट्याक्ट ट्रेसिङय् संलग्न चिकित्सक खः । वय्कः कपिलवस्तु व रुपन्देहीइ कन्ट्याक्ट ट्रेसिङ यानाः जेठ १ गते जक येँ लिहांवःम्ह खः । वय्क इपिडिमियोलोजी तथा रोग नियन्त्रण महाशाखाया चिकित्सक खः ।

ख्वपय् संक्रमितया बारे धाःसा अझ जानकारी मवनीगु खँ अनया जिल्ला प्रशासन अधिकृत हुमकला पाण्डें धयादिल । वय्कलं स्वास्थय मन्त्रालयनाप समन्वय जुयाच्वंगु व छुं ई लिपा जक थप जानकारी वइगु धयादिल ।