रञ्जना लिपि सहितया एम्बुलेन्स

येँ – अत्याधुनिक स्वास्थ्य सेवा सहित येँय् ब्वाँय् वनीगु नेपाल एम्बुलेन्स सेवाया एम्बुलेन्सय् आः रञ्जना लिपि सहित येँ महानगरपालिकाया लोगो नं दइगु जूगु दु । उगु एम्बुलेन्स सेवालिसे म्हिगः येँ महानगरपालिकां याःगु सम्झौताय् एम्बुलेन्सय् ‘काठमाडौं महानगरपालिकाको सहकार्यमा सञ्चालित एम्बुलेन्स सेवा’ धइगु वाक्य रञ्जना लिपिं समेत च्वयेमाः धइगु बुँदा नं दुथ्याकातःगु दु ।

सम्झौताय् हस्ताक्षर जुइवं रञ्जना लिपिं थ्व व्यहोरा च्वयाः तिकातःगु झिगलं एम्बुलेन्स म्हिगः राष्ट्रिय सभागृहय् दिके हःगु खः । सम्झौता कथं आः येँ मनपां उगु एम्बुलेन्सयात छगःया लय् १ लाख २० द्वः तकाया ल्याखं सञ्चालन खर्च उपलब्ध याकी । एम्बुलेन्स सेवां थःगु सम्पूर्ण भ्वं, बिल, भर्पाई, वेब साइटय् समेत ‘काठमाडौं महानगरपालिकाको सहकार्यमा सञ्चालित’ धकाः च्वयेगु याइ । ७० दँ स्वयां च्वय्यापिं, मस्त, अपांगता दुपिं व गरिब नगरवासीयात निःशुल्क सेवा बीमाः धकाः नं मनपां शर्त तःगु दु ।

स्वनिगः दुने २८ निसें ३० प्रतिशत तक विरामीत छेँनं अस्पताल यंकीबलय् इलय् वासः मजुयाः लँय् हे सीगु तथ्यांक दु । थ्व एम्बुलेन्स सेवां डाक्टर हे दुने च्वनाः विरामीयात माःगु वासः समेत यायां अस्पताल थ्यंकीगु जुयाः थुकियात ‘प्रि हस्पिटल केयर’ नं धायेगु याः ।

म्हिगः येँ मनपाया मेयर विद्यासुन्दर शाक्य व एम्बुलेन्स सेवाया अध्यक्ष रंजित आचार्यं सम्झौताय् हस्ताक्षर यानादीगु खः । ज्याझ्वलय् न्ववासें मेयर शाक्यं जनताया करं जनतायात हे सुविधा बीगु विश्वास प्वंकादिल । अध्यक्ष आचार्यं वंगु गुदँया दुने थःपिनि एम्बुलेन्स दुने हे ४७ म्ह प्वाथय् दुपिं मिस्तय्सं सुरक्षितपूर्वक मचा बुइकूगु रोचक तथ्य न्ह्यब्वयादिल ।

सम्बन्धित बुखँ

LEAVE YOUR COMMENTS