उपमेयर समेत साइबर शिकारय्
येँ (नेपालभाषा टाइम्स)- देशय् साइबर अपराध याइपिं आः थुलि अप्वया वयेधुंकल कि उकिया विरुद्ध येँ महानगरपालिकाया उपमेयर समेत साइबर ब्युरोय् उजुरी तयेत बाध्य जूगु दु । उपमेयर सुनिता डंगोलं थःगु नां तयाः सामाजिक सञ्जालय् चायेकातःगु अनधिकृत खाता व पेज चीकाः उमित कारबाही यायेत नेपाल प्रहरीया साइबर ब्युरोयात इनाप यानादीगु खः ।
थ्व स्वयां न्ह्यः नं अज्याःगु पेज बन्द यायेत इनाप यानाः नं आः तक बन्द मजूगु धासें हाकनं ताकेत यानागु खँ उपमेयरया सचिवालय प्रमुख सौरभ गौतमं साइबर ब्युरोयात च्वःगु पतिइ न्ह्यथनातःगु दु । गौतमं च्वःगु पतिइ २०८१ जेठ १३ व असार २५ गते छुं फेसबुक पेजत बन्द यायेत पौ च्वयागु खःसां आः तक बन्द मजूगु खँ धयातःगु दु ।
थ्व झ्वलय् सचिवालयं छगू विज्ञप्ति पित बिसें एआई प्रविधिं फोटो व भिडियो एनिमेसन यानाः सामाजिक सञ्जालय् तयाः व्यक्तिया चरित्र हत्या यायेगु तकया ज्या जुयाच्वंगुलिं फयांफछि याकनं अनुसन्धान यानाः उगु भिडियो, फोटो व समाचार चीका बीत व अज्याःगु ज्या याइपिंत कारबाही यायेत इनाप याःगु दु ।
उपमेयर डंगोलं अनधिकृत कथं चायेकातःगु पेजपाखें मिसातय्गु चरित्र हत्या यायेगु, समाजय् विद्वेष न्यंकेगु गलत गतिविधि अप्वया वनाच्वंगु धासें अज्याःगु पेजया निगरानी व बन्द यायेत इनाप यानागु खँ धयादीगु दु ।
वय्कलं थज्याःगु पेजं प्रविधिया दुरुपयोग यानाः चरित्र हत्या यायेगु ज्या जुयाच्वंगु व अज्याःगु खँयात आः हे नियन्त्रण मयायेगु खःसा प्रविधिया कारणं हे मिसापिं असुरक्षित जुइमालीगु खँ धयादीगु दु ।
लुमंकेबहः जू, आः नकतिनि हे मेयर बालेन साह व उपमेयर डंगोलया कृत्रिम भिडियो दयेकाः आपत्तिजनक दृश्य पोष्ट यानातःगु खः । थुकिं उपमेयर जक मखु समग्र मिसापिनिगु हे प्रतिष्ठाय् आघात लाकेगु ज्या जुल धकाः टिप्पणी यानाहःगु दु ।
बालेन साह चाहिँ चुपचाप ?
येँ मनपाया मेयर बालेन साह व उपमेयर सुनिता डंगोलया एनिमेटेड भिडियो दयेकाः सामाजिक सञ्जालय् पोष्ट यानातःगु सामग्रीयात कयाः उपमेयर डंगोलं आपत्ति जक क्यंगु मखु, साइबर ब्युरोय् उजुरी समेत बियादीधुंकाः नं मेयर बालेन साहं धाःसा उगु सामग्रीयात कयाः छुं न्ववानादीगु मदुनि । अज्याःगु सामग्रीपाखें मिसाया अपमान जुल धकाः उपमेयरं सार्वजनिक रुपं न्ववाःसां मेयर धाःसा चुपचाप च्वनाच्वंगुलिं वय्कःयाके मिसाप्रति सम्मान भाव मदुगु प्रस्ट जूगु खँ धयाहःगु दु ।
LEAVE YOUR COMMENTS