नेपालभाषा विभाग कि नेवाः विभाग ?

यल – उच्चशिक्षाय् नेपालभाषा ब्वनेगु ब्वंकेगु ज्या जुयाच्वंगु नेपालभाषा केन्द्रीय विभागया नां हिलीगु धकाः वयाच्वंगु चर्चायात कयाः नेवाः बुद्धिजीवीतय् दथुइ विशेष चिउताः ब्वलंगु दु । थनया भाषाह्यमितय्सं छुं न्हि न्ह्यः जक नां हिले मजिउ धइगु माग यासें केन्द्रीय विभागया प्रमुख डा. ओमकारेश्वर श्रेष्ठया छगू हस्ताक्षर संकलन समेत लःल्हाःगु खः ।

विभाग प्रमुख डा. श्रेष्ठं छुं न्हि न्ह्यः जक छगू ज्याझ्वलय् न्ववासें नेपालभाषा केन्द्रीय विभागया नां हिलाः आः ‘नेवार अध्ययन केन्द्रीय विभाग’ तयेगु जुइ धकाः न्ववानादीगु खः । वय्कःया उगु सम्बोधन लिपा नेवाः ख्यलय् थुकियात कयाः चिउताः प्वंकेगु ज्या जुया वःगु खः ।

थ्व विषयय् न्यनेत विभाग प्रमुख डा. श्रेष्ठयात नेपालभाषा टाइम्सपाखें स्वापू तयाः न्यनेकने यानाबलय् वय्कलं थौंकन्हय् शिक्षा ख्यलय् वयाच्वंगु हिउपाःयात आत्मसात यायेगु लागिं नां हिलेगु बारे बिचाः जूगु खँ कनादिल । आः केन्द्रीय विभागय् केवल भाषा जक ब्वंकां मगाःगु व नेवाःतय् समग्र पक्षयात कयाः अध्ययन अध्यापन याकेगु ग्वसाः जूगुलिं नां हिलेगु खँ वःगु जानकारी वय्कलं बियादिल ।

नेपालभाषा केन्द्रीय विभाग धायेबलय् केवल भाषा जक ब्वंकीगु खँ वइगु जुयाः ‘नेवाः अध्ययन केन्द्रीय विभाग’ धकाः नां तयेबलय् नेपालभाषा लगायत नेवाःतय्गु समग्र पक्ष ब्वंके फइगु खँ वय्कलं कनादिल । ‘नेपालभाषा’ धायेगु स्वयां ‘नेवाः’ धायेगु अझ व्यापक अर्थय् वनीगु व विभागया अध्ययन लागा नं आः व्यापक जुइत्यंगु जुयाः नां हिलेगु बारे चर्चा जूगु खँ नं वय्कलं कनादिल ।

नां हिउसां अन नेवाःतय्गु भाषा, कला, संस्कृति, धर्मदर्शन, साहित्य, इतिहास आदि विषय नेवाः भासं हे ब्वने फइगु खँ नं वय्कलं स्पष्ट यानादिल ।

सम्बन्धित बुखँ

LEAVE YOUR COMMENTS