ने. सं. ११४४ ञलाथ्व नवमी -

सम्पदा पदयात्रा औपचारिक रुपं शुरु

येँ – विश्व सम्पदा दुने लाःगु येँया हनुमानध्वाखा लाय्कूनिसें स्वयम्भू तकया सम्पदा पदयात्रा औपचारिक रुपं शुरु जूगु दु । विश्व सम्पदा उत्सव मूल समारोह समितिया ग्वसालय् जूगु सम्पदा पदयात्रा थनया मरु गणेद्यःया न्ह्यःनं शुरु जूगु खः ।
येँ मनपा २० वडाया वडाअध्यक्ष राजेन्द्र मानन्धरया संयोजनय् जूगु पदयात्राय् थीथी ब्वनेकुथिया विद्यार्थीय् उल्लेख्य रुपं उपस्थिति दुगु खः ।

छवाःयंकं थीथी ज्याझ्वः यासें विश्व सम्पदा दिवस हनेगु झ्वलय् न्हापांगु न्हि बैशाख २ गते विद्यार्थी सम्पदा पदयात्रा जूगु खः । उगु पद यात्रा येँ मनपा १५या वडाअध्यक्ष ईश्वरमान डंगोल, १८ वडाअध्यक्ष न्हुछेकाजी महर्जन व २० वडाअध्यक्ष राजेन्द्र मानन्धरं मंकाःकथं रिवन चानाः उलेज्या यानादीगु खः ।

पदयात्रा मरु गणेद्यःयाथासं शुरु जुयाः मरु हिति, सन्तानेश्वर महाद्यः, मरुबही, बञ्जाःहिति, चस्वांद्वँ, दमाइ त्वाः, सुन्तागल्ली, पाछै गल्ली, न्यत, ताम्सिपाखा, बुरांख्यः, तपिंतां, डल्लु, धिमय् ल्वहं, भगवानपाउ जुया भुइख्यलय् थ्यंकाः क्वचायेकूगु खः ।
माउण्ट ग्लोरि स्कुल, मोडर्न नेवाः इंग्लिश स्कुल लगायत आपालं ब्वनेकुथिया विद्यार्थीतय् सहभागिता दुगु पदयात्राय् ब्वति कायेत वःपिंत विश्व सम्पदा उत्सव मूल समारोह समितिया छ्यांजे दिल्लीरत्न तुलाधरं लसकुस यानादीगु खः ।

अथे हे विश्व सम्पदा उत्सव मूल समारोह समिति निर्देशन कमिटीया संयोजक नापं येँ क्षेत्र नं ८ या प्रतिनिधिसभा सदस्य जीवनराम श्रेष्ठं सुभाय् देछायेगु झ्वलय् थुगु पदयात्रा ऐतिहासिक जूगु नापं न्ह्याबलें नं लुमंकातयेबह जुइगु विश्वास प्वंकादीगु खः । न्हू पुस्तायात सम्पदासम्बन्धी जनचेतना थनेगु नापं संस्कृति हस्तान्तरण यायेगु ल्याखं सांसद श्रेष्ठया नेतृत्वय् उगु सम्पदा यात्रा जूगु खः ।

मूल समारोह समितिया ग्वसालय् छवाःयंकं थीथी ज्याझ्वः यानाः हनेगु झ्वलय् थ्व हे वइगु बैशाख ८ गते मू ज्याझ्वः जुइ । उकुन्हु हनुमानध्वाखां न्ह्याइगु सम्पदा पदयात्राया उलेज्या संस्कृति, पर्यटन तथा नागरिक उड्डयन मन्त्री रवीन्द्र अधिकारी यानादीगु ज्याझ्वः दुसा स्वयम्भूइ जुइगु समापन ज्याझ्वलय् मूपाहांकथं प्रधानमन्त्री केपी ओली झायादी ।