वरिष्ठ कलाकार जोशीया हना

येँ (नेपालभाषा टाइम्स)÷ वरिष्ठ निर्देशक, कलाकार व रचनाकार पवन जोशीं च्वयादीगु म्ये सछिपु थ्यंगु झ्वलय् लाकाः वय्कःया हनेज्या जूगु दु । वय्कलं च्वयादीगु नेपाली व नेपालभाषाया सछिपु म्ये रेकर्डिङ जूगु लसताय् लहना मिडियापाखें वय्कःया हनेज्या जूगु खः ।

बागमति प्रदेशया श्रम, रोजगार व यातायात मन्त्री प्रेमभक्त महर्जनं हनापौ देछायादीगु ज्याझ्वलय् लहना मिडिया अध्यक्ष नृपेन्द्रलाल श्रेष्ठं दोसल्लां न्ययेकाः, अथेहे व्यवस्थापक सुरेन्द्रभक्त श्रेष्ठं स्वांमाः क्वखायेकाः भाजु जोशीया हनेज्या याःगु खः । अथेहे वय्कःयात नेवाः संस्कृति कथं ख्येँ सगं देछाःगु खः ।

ज्याझ्वलय् मू पाहाँ बागमति प्रदेश मन्त्री महर्जनं कला क्षेत्रया संरक्षण व कलाकारया सम्मानया निंतिं प्रदेश सरकारपाखें ठोस पलाः न्ह्याकेगु निंतिं थःम्हेसिनं कुतः यायेगु खँ धयादीगु दु । ज्याझ्वलय् पाहाँ येँ महानगरपालिका १८ वडाया अध्यक्ष न्हुछेकाजी महर्जन, नेवाः पत्रकार राष्ट्रिय दबूया वरिष्ठ उपाध्यक्ष सुनिल महर्जन, फोनिजया कार्यवाहक महासचिव सलिम बलामीपिंसं नं जोशीयात भिंतुना देछायादीगु खः ।

ज्याझ्वलय् प्रवेशमान शाक्य, सतिस महर्जन, रत्नशोभा महर्जन, सरस्वती मानन्धर, अगिना तण्डुकार, अनिल तुलाधर, शुद्धलक्ष्मी श्रेष्ठ, जयसिद्धि लक्ष्मी वज्राचार्य, कृष्ण महर्जन, सोनी राजभण्डारी, सरिता महर्जन, स्वतन्त्र महर्जनपिंसं भाजु जोशीं च्वयादीगु थीथी म्ये न्यंकादीगु खः । अथेहे आराध्यालक्ष्मी खड्गी, अनु महर्जन, किशोर शाही व मीरा डंगोलं भाजु जोशीं च्वयादीगु थीथी म्येय् हुलाप्याखं न्ह्यब्बयादीगु खः ।

ज्याझ्वलय् म्ये हालादीम्ह कृष्ण महर्जन, रेकर्डिस्ट विजय मास्की, संगीतकार अनिल तुलाधर व जोशीया सच्छिपुगु म्ये हालादीम्ह सरिता महर्जनयात नंं विशेष सम्मान लःल्हागु खः ।