मिस ईकलेज उपाधि विजेतापिं थाइल्याण्ड भ्रमणं लिहां वल

येँ – सिजन मिडिया प्रा.लि.या ग्वसालय् जूगु ‘मिस ईकलेज–२०१८’या उपाधि विजेतापिं थाइल्याण्ड भ्रमण यानाः लिहां वःगु दु । संस्थाया ग्वसालय् वंगु छुं दिं न्ह्यः जूगु धेंधेंबल्लाः कासाय् मुख्य उपाधि त्याकादीम्ह काजोल तामाङ, फस्ट रनरअप सोफिया श्रेष्ठ, सेकेन्ड रनरअप आस्मी गौतम थाइल्याण्ड भ्रमण यानाः नेपाः लिहां वःगु खः । सिजन मिडियां उपाधि विजेता वय्कःपिंत खुन्हुया थाइल्याण्ड भ्रमणया उपहार बिउगु खः । भ्रमणया इलय् वय्कःपिंसं अनया सांस्कृतिक, सामाजिक विषयय् थुइकेगु नापं अनया बौद्ध स्तुपाया अवलोकन भ्रमण नं याःगु संस्थां जानकारी बिउगु दु । नेपालय् जुइगु थीथी कथंया सौन्दर्य कासाय् उपाधि त्याकेत सफल जूपिंत थुकथं विदेश भ्रमणया अवसर बिउगु थ्व हे नेपाःया हे न्हापांगु संस्था जूगु सिजन मिडियाया प्रबन्ध निर्देशक प्रदीवराज वन्तया दावी दु ।