नेपाललिपि युनिकोडय् दुथ्याकूगु योगदानयात कयाः देवदासयात लुमंकल

येँ (नेपालभाषा टाइम्स)- मदुम्ह भाषासेवी ई. देवदास मानन्धरयात लुमंकाः न्ह्याकाच्वंगु जूम ज्याझ्वलय् मानन्धरं यानादीगु थीथी ज्याझ्वःयात कयाः थीथी व्यक्तिपिंसं वय्कःया योगदानयात कयाः थःथःगु बिचाः प्वंकादीगु दु ।

श्रष्टा समाज अमेरिका व लक्ष्मीदास मानन्धर लुमन्ति पुचःया ग्वसालय् आइतवाः जूगु ज्याझ्वलय् मदुम्ह मानन्धरं नेपाल लिपियात युनिकोडय् दुथ्याकेगु निंतिं यानादीगु ज्यायात कयाः न्ववायेगु झ्वलय् फन्ट डिजाइनर भाजु समीर कर्माचार्यं वय्कः न्ह्याग्गु ज्याय् नं दुबिनाः ज्या यायेफुम्ह व्यक्तित्व जूगु खँ कनादिसें वय्कलं नेपाल लिपियात युनिकोडय् दुथ्याकेगु निंतिं तःधंगु हे संघर्ष व मेहनत यानादीगु खँ कनादीगु दु । थःपिं मानन्धरलिसे युनिकोडय् नेपाललिपि दुथ्याकेगु निंतिं चाःन्हिं मधासे ज्या यानागु खँयात लुमंकुसें वय्कः ज्वःमदुम्ह व्यक्तित्व जूगु खँ कनादिल ।

अथेहे येँ महानगरपालिकाया प्रवक्ता नापं १७ वडाया अध्यक्ष नवीन मानन्धरं देवदास मानन्धरया कुतलय् नेपाल मैत्री अध्ययन मण्डल पुस्तकालयपाखें न्हूदँबलय् नेपालभाषाया न्हापांगु क्यालेण्डर पिकायेगु ज्या जूगु व वय्कःलिसे थःपिं नं उगु क्यालेन्डर म्यू वनागु अनुभव कनादिल । वय्कलं मदुम्ह मानन्धरं नेपाल लिपियात युनिकोडय् यंकेगु निंतिं संघर्ष याःम्ह जक मखु, सांस्कृतिक ख्यलय् नं
त्वाःया मचांनिसें तःधिकःपिं सकसितं जागृत यायेगु निंतिं यानादीगु योगदानया चर्चा यानादिल ।

ज्याझ्वलय् भाषासेवी विष्णु चित्रकारं देवदास मानन्धरलिसे नेपाललिपि युनिकोडय् दुथ्याकेगु निसें नेपाल संवत्या क्यालेण्डर दयेकेगु ज्याय् यानागु ज्याखँयात लुमंकाः देवदास मानन्धर छम्ह धात्थेंयाम्ह भाषासेवी व बहुआयामिक व्यक्तित्व जूगु खँ कनादिल । उगु ज्याझ्वलय् भाषा ख्यःया व्यक्तित्वपिं राजेश शाक्य, राजेन्द्रमान शाक्य, सिजन श्रेष्ठ, प्रमेश श्रेष्ठ, रितादेवी प्रधान व प्रमिला मानन्धरं देवदासं यानादीगु योगदानयात कयाः थःथःगु नुगःखँ कनादीगु खः ।

जूम ज्याझ्वः नेपालभाषा कवयित्री प्रतिसरा साय्मि व संचारकःमि सिल्भिया राजोपाध्यायं न्ह्याकादीगु खः । थुगु ज्याझ्वलय् थ्यंमथ्यं सछिम्ह स्वयां अप्वसिनं ब्वति काःगु खःसा ब्वति काःपिं सकलसित लक्ष्मीदास मानन्धर लुमन्ति पुचःया दुजःलिसें देवदास मानन्धरया जहान सरोज मानन्धरं सुभाय् देछानादीगु खः ।