लकडाउनया दथुइ नं बुंगद्यःया रथ दयेकेगु शुरु

यल- कोरोनाया कारणं यानाः थगुने जात्रा याये मखनाः विवादय् समेत लाःगु बुंगद्यःया जात्रा थुगुसी धाःसा यानां त्वःतेगु ताः तयाः रथ दयेकेगु ज्या शुरु जूगु दु । थनया पूच्वय् म्हिगःनिसें रथ दयेकेगु ज्या न्ह्याःगु खः ।

सामान्यतया बुंगद्यःया न्हवं जूगु न्हि कुन्हुनिसें हे पूच्वय् रथ दयेकेगु ज्या नं शुरु जुइगु खः । म्हीग बुधवाः लगं ख्यलय् न्हवं याःगु खःसा म्हिगः विहीवाः सुथंनिसें पूच्वय् रथ दयेकेगु ज्या न्ह्याःगु खः । अन म्हिगः सुथंनिसें हे बुंगद्यःया पांग्रा पित हयाः रथ दयेकेगु शुरु याःगु खः ।

थुगुसी नं कोरोना महामारीया कारणं जात्रा पर्व, मेला सञ्चालन यायेगु ज्या मयायेत स्थानीय प्रशासनं सार्वजनिक इनाप यानाच्वंसां नं बुंगद्यःया रथ दयेकेगु ज्याया लागिं धाःसा यलया सीडीओं नं स्वीकृति बिउगु खँ धाःगु दु । लिसें थुकियात गुथि संस्थानं नं स्वीकृतिया नापनापं बजेट नं बिउगु दु ।

मनूया धार्मिक ज्याखँय् नुगःया आस्था नं स्वानाच्वंगु कारणं अज्याःगु ज्याखँय् राज्यं हस्तक्षेप याये मजिउगु खँ धासें स्थानीय प्रशासनं थुकी ग्वाहालि यानाच्वनागु खँ धाःगु दु ।