ने. सं. ११४३ चौलाथ्व तृतीया -

आखः किपा च्वज्या कासाय् उत्कृष्ट जूपिंत सिरपाः लःल्हात

येँ (नेपालभाषा टाइम्स) – नेपाल लिपि गुथिया ग्वसालय् थुगुसी नेपाल संवत् ११४१ न्हूदँया लसताय् जूगु भिंतुना आखः किपा च्वज्या कासाय्उ त्कृष्ट जूपिंत वंगु शनिवाः छगू बःचाधंगु ज्याझ्वःया दथुइ सिरपाः लःल्हायेगु ज्या जुल । गुथिपाखें थुगुसी न्हूदँया लसताय् सामाजिक संजाल फेसबुकया माध्यमं ‘नेपाल संवत् ११४१ न्हूदँया लसताय् भिंतुना’ धइगु आखः किपा च्वकासा ग्वसाः ग्वःगु खः ।

रञ्जना व नेपाल लिपिं च्वयातःगु आखःमध्ये उत्कृष्ट जूपिंत गुथिया थःगु हे ज्याकुथिइ सीमित व्यक्तिपिंत जक ब्वनाः सिरपाः लःल्हाःगु खः । कोरोना संक्रमणया जोखिमयात ध्यानय् तयाः गुथिया ज्यासना पुचः, सिरपाः ल्यज्या पुचः, सिरपाः त्याकादीपिं व गुथियात न्ह्याबलें ग्वाहालि याना वयाच्वनादीपिं सीमित व्यक्तियात जक ब्वनाः सिरपाः लःल्हायेगु ज्या जूगु खः ।

उगु आखः किपा च्वज्या कासाय् एलिसा महर्जन न्हाप, सानुमाया किला श्रेष्ठ लिउ व उषा गसि श्रेष्ठ लियांलिउ जुयादीगु खःसा वय्कःपिंत गुथिया नायः निरञ्जन तबःनं सिरपाः व दसिपौ लःल्हानादीगु खः । सिरपाःकथं न्हापयात न्याद्वः, लिउयात स्वद्वः व लियांलिउयात निद्वः तका सिरपाः लःल्हाःगु खःसा उत्कृष्ट झिम्हय् लायेत ताःलाःपिं मतिना महर्जन, सुरेश महर्जन, मणिराज मानन्धर, सहज ताम्राकार, कृष्ण चित्रकार, राजेन्द्र श्रेष्ठ व अमन शाक्ययात हःपाः सिरपाःकथं सफू, टिशर्ट लःल्हाःगु खः ।

अथे हे झिंखुदँ क्वय्या ब्वति कयादीपिं मध्ये दकलय् बांलाःगु आखःकथं सचेतना मानन्धरयात नं विशेष सिरपाः लःल्हाःगु खः । कासाया निंतिं लिपि स्यनामि विक्की वज्राचार्यया संयोजकत्वय् अनिल स्थापित व आनन्द वज्राचार्य दुथ्याःगु छगू ल्यज्या पुचः नं गठन यानातःगु खःसा ज्याझ्वलय्ल्य ज्या पुचःया कजि वज्राचार्यं लसकुस यानादीगु खःसा कासाय् गुकथं ल्यज्या जुल धइगु बारे दुजः स्थापितं जानकारी बियादीगु खः ।