थँहितिया लःघः गुथिछेँ उलेज्या

येँ – थँहितिया परम्परागत लःघःछेँ त्वाःया नासःद्यः गुथि छेँ पुनर्निर्माण लिपा उलेज्या जूगु दु । बुधवाः छगू ज्याझ्वःया दथुइ येँ महानगरपालिकाया मेयर विद्या सुन्दर शाक्यं लःघः गुथि छेँया उलेज्या यानादिल । ज्याझ्वलय् न्ववानादिसें मूपाहाँ मेयर शाक्यं स्वनिगःया मूर्त अमूर्त सम्पदा संरक्षणया निंतिं महानगरपालिका न्ह्याब्लें तयार दुगु खँ धयादिसें लःघःछेँ त्वाःया दुगुद्यः जुयाच्वंगु लैनचौरया सतक दथुइ लानाच्वंगु द्यःयाथाय् देगः दनाबीत महानगरपालिका तयार दुगु खँ धयादिल ।

‘पुरातत्व विभाग व सडक विभागलिसे समन्वय यानाः येँ महानगरपालिकां अन सतकय् अवरोध मवइकथं देगः दनेत तयार दु । थुकीया निंतिं उपभोक्ता समिति मार्फत हे ज्या याःसा उपयुक्त जुइ । मनपां माःगु ग्वाहालि याइ’ वय्कलं धयादीगु दु ।

ज्याझ्वलय् नासःगुथि छेँ दनेगु निंतिं चन्दा बियादीपिं, छँे पुनर्निर्माण कमिटीया दुजःपिं लिसें थीथी कथं ग्वाहालि यानादीपिंत मेयर शाक्यं हनापौ नं देछायादीगु खः । त्वाः नायः सुकुकाजी महर्जनया सभपातित्वय् जूगु ज्याझ्वलय् येँ मनपाया उपमेयर हरिप्रभा खड्गी श्रेष्ठ, पुलांम्ह राज्यमन्त्री तीर्थराम डंगोल, नेवाः देय् दबूया नायः नरेश ताम्राकार, १७ वडाया अध्यक्ष नवीन मानन्धर, ज्यापु महागुथि नेपाःया नायः राजभाइ जकःमि, ज्यापु संस्कृति विकास कोषया नायः मंगल सिंहपिंसं नं न्ववानादीगु खः ।