हलिं नेवाः न्ह्यसः लिसःया बिजं कासा शनिवाः
येँ (नेपालभाषा टाइम्स)- हलिं नेवाः दबूपाखें न्ह्याकाच्वंगु नेपालभाषा न्ह्यसःलिसः कासाया बिजं कासा थ्वहे वइगु कौलागाः त्रयादशि (कार्तिक २५ गते) शनिवाः कुन्हु याइगु जूगु दु । थ्व कासाय् मुक्कं प्यंगू पुचलं ब्वति काइ ।
न्ह्यानाच्वंगु कासाया बारे जानकारी बीत वंगु शुक्रवाः हलिं नेवाः दबूपाखें छगू भर्चुयल पत्रकार सम्मेलन यात । अन जानकारी बिउ कथं थ्व कासाय् मुक्कं २१ गू पुचलं ब्वति काःगु खः । उकी मध्ये निगू पुचः अमेरिकापाखें व छगू पुचः बेलायतपाखें ब्वति काःगु खः । कासा वंगु गुंलाथ्व तृतियानिसें न्ह्याःगु खःसा थुकी १२ तगिं तकया ब्वँमितय्सं ब्वति काये फइ ।
कासाय् न्हाप लाःगु पुचःयात १००० अमेरिकी डलर, लिउ लाःगु पुचःयात ८०० डलर, लियां लिउ लाःगु पुचःयात ६०० डलर व हःपाः लाःगु पुचःयात ४०० डलर सिरपाः बीगु व्यवस्था यानातःगु दु । कासापतिक त्याःगु पुचःयात ८० डलर सिरपाः बीगु खः ।
हलिं नेवाः दबूया नायः संयुक्त श्रेष्ठं कनादीकथं थ्व कासाय् फुक्कं यायेबलय् करिब ५ लाख नेपाली दां बराबरया सिरपाः बीगु व्यवस्था जुयाच्वंगु दु । थ्व छगू अन्तर्राष्ट्रियस्तरया कासा जूगु कारणं थुकिया स्तर नं उकथं हे कायम यायेगु कुतः जूगु खँ नं वय्कलं कनादिल ।
थुगु कासाया लागिं आवश्यक न्ह्यसः दयेकेत स्वनातःगु पुचःया कजि केशरमान ताम्राकारं थुकी नेपालभाषा ख्यःया ५० प्रतिशत व बाँकी न्ह्यसः राष्ट्रिय अन्तर्राष्ट्रिय थीथी ख्यःलिसे सम्बन्धित यानाः दयेकागु खँ कनादिल । थुकिया लागिं छगू ‘न्ह्यसः बैंक’ हे दयेका तयागु जानकारी नं वय्कलं बियादिल ।
कासाया मूकजि सामन्तश्रीरत्न वज्राचार्यं कासाया न्ह्यसःया पाय्छि लिसः विवादास्पद मजुइकेत थःपिंसं पूवंक कुतः यानागु खँ कँसें ग्वसाः खलकं दयेकूगु गुगुं नं न्ह्यसः गनं नं पिहां मवंगु दावी नं यानादिल ।
थुगु कासाय् नेपालभाषा ख्यःया थीथी बनेबहःपिंसं निर्णायकया भूमिका म्हितादीगु खः । हलिं नेवाः दबूपाखें याःगु थ्व निक्वःगु नेपालभाषा न्ह्यसः लिसः कासा खः ।
LEAVE YOUR COMMENTS