नृसिंह जात्रा स्वः वयेत निमन्त्रणा
यल(नेपालभाषा टाइम्स)÷ थनया राजोपाध्याय समुदायया उपाकर्म गुथिं नृसिंह जात्रा स्वः वयेत धासें निमन्त्रणा याःगु दु । गुथिपाखें दँय्दसं गुंलागा पंचमिकुन्हु न्यायेकेगु याना वयच्वंगु जात्राय् थकु जुजुयात जात्रा स्वः वयेत धासें निमन्त्रणा याःगु खः । जात्रा स्वः वयेत थकु जुजुयात निमन्त्रणा यायेगु परम्पराकथं उगु ज्याझ्वः यल लाय्कूस्थित सुन्दरी चुकय् जूगु खः ।
यलया राजोपाध्याय समुदायया खुगू कुलयापिं दुथ्यानाच्वंगु उपाकर्म गुथिं थ्व जात्रा दँय्दसं संचालन याना वयाच्वंगु दु । जात्रा संचालनया भाला थकालिया लिधंसाय् पाः बीगु खः । नृसिंह जात्राया झ्वलय् गुंपुन्हिकुन्हु जुइगु श्रावणी कर्मय् नं ब्वति कायेत यलया थकु जुजुपिंसं निमन्त्रणा यायेगु चलन दया वयाच्वंगु दु ।
थुगुसी जात्रा संचालन व व्यवस्थापनया भाला कयातःम्ह पाःलाः मदुम्ह नृपेन्द्रराज शर्माया तःधिकःम्ह काय त्रिलोचन शर्मा राजोपाध्यायं मल्ल जुजुयात जात्रा स्वः वयेत धासें निमन्त्रणा बियादीगु खः । थथे निमन्त्रणा यायेगु इलय् स्वां, सिसाबुसा, ग्वय्, जनै, ध्यबा आदि तयाः सुन्दरी चुकया ल्वहंया खाताय् तयेगु चलन दु ।
जात्रा स्वः वयेत याःगु निमन्त्रणा मल्ल जुजुया प्रतिनिधिकथं गुथि संस्थान यलया प्रमुख बैकुण्ठ आचार्य, यल संग्रहालयया प्रमुख सुरेश लाखे लगायतं लःल्हाना कयादीगु खः ।
थुकथं जात्रा स्वः वयेत राष्ट्रपति रामचन्द्र पौडेलयात नं ब्वंगु दु । राष्ट्रपति पौडेलयात निमन्त्रणा बीगु निंतिं थुगुसी पाः कयादीम्ह त्रिलोचनलिसें सुलोचनराज शर्मा, उपाकर्म गुथिया पदाधिकारी, नृसिंह जात्रा व्यवस्थापन समितिया दुजःपिं राष्ट्रपति भवन शितल निवास वंगु खः ।
LEAVE YOUR COMMENTS