उपत्यका काठ चक्रपथ ,प्रदेश ३या गौरवया आयोजना

प्रदेश नं. ३ सरकारं स्वनिगःया स्वंगू जिल्ला व ३० गू प्रदेश निर्वाचन क्षेत्रयात स्वायेकथं स्वनिगलय् ‘काठमाडौं उपत्यका चक्रपथ’ निर्माणयात प्रदेश गौरवया आयोजनाया रुपय् न्ह्यःने हःगु दु । ‘उपत्यका काठ चक्रपथ’या हाकः १३५ किलोमिटर जुइगु प्रारम्भिक अध्ययनं क्यंगु दु ।

थुकथं हे केन्द्र सरकारं स्वंगू जिल्ला स्वाइकथं ७२ किलोमिटर ताःहाकःगु बाहिरी चक्रपथ निर्माण प्रक्रिया नं न्ह्याकूगु दु । वंगु आर्थिक दँय्् उपत्यका काठ चक्रमपथया विस्तृत परियोजना प्रस्ताव निर्माणया निंतिं १ गू करोड २० गू लाख विनियोजन याःगु खः ।

थ्व चक्रपथ शंखरापुर नगरपालिका सक्वया कार्कीगाउँ–कागेश्वरी मनोहरा नगरपालिकाया अधिकारी गाउँ–सातघट्टे, कतुवा, पुवार गाउँ, फुयाँल गाउँ, गोकर्णेश्वर नगरपालिकाया सुन्दरीजल, नयाँपाटी, बालुवा, जगडोल, भुइजःसि नगरपालिकाया चुनिखेल, चपली, भुइजःसि, तोखा, झोर महांकाल, काभ्रेस्थली, जीतपुर, न्यागःमणि, मुड्खु, रानीवन, भीमढुंगा, रामकोट जुयाः सिउचाटारय् लाकी ।

थुकथं हे पुलांगु नैकाप, दहचोक, थक्वाः, मातातीर्थ, मछेगां, किपू, ब्वसिगां, यलया ख्वना, ललितघुम्ती, ख्पपया गुण्डु, सुडाल, तेलकोट जुयाः येँइा पुलांगु पालुवारी, सक्व जुयाः कार्की गामय् स्वाकेकथं अध्ययन यायेगु ज्या जूगु प्रादेशिक भौतिक पूर्वाधार विकास मन्त्रालयं न्ह्यथंगु दु ।

प्रारम्भिक अध्ययनकथं १३५ किमिया काठ चक्रपथमध्ये शंखरापुर नगरपालिका सक्वपाखें कागेश्वरी मनोहरा नगरपालिका जुयाः गोकर्णेश्वर नगरपालिकातकया २५ किमिया विस्तृत परियोजना प्रस्ताव (डीपीआर) तयार जुइधुंकूगु उगु मन्त्रालयया इन्जिनियर पुण्यराम सुलुं कनादिल । ल्यं दुगु १०० किमि लँपुया निंतिं सम्भाव्यता अध्ययन जुयाच्वंगु नं वय्कलं धयादिल ।

स्वनिगःया हाकुगुँयात थिया वनेगुकथं काठ क्षेत्रयात कःघानाः चक्रपथ निर्माण यायेगु योजना २०४९ सालय् जिल्ला विकास समितिं हे न्ह्यःहने हःगु प्रदेशसभा सदस्य रामेश्वर फुयाँलं कनादिल । ‘वि.सं. २०४९ य् न्हापांगु जिल्ला परिषदं थ्व योजना न्ह्यःने हःगु खः ।

तात्कालीन जिविस सभापति चित्रबहादुर केसी, उपसभापति नारायण ढकाल व जि थः हे साविकया आलापोट गाविसया अध्यक्ष जुयाच्वनागु इलय् थ्व चक्रपथया प्रस्ताव यानागु खः, परिषदं पारित याःसां नं थीथी कारणं थुकिया ज्या न्ह्याः वने मफयाच्वंगु खः, प्रदेश सरकारं हालय् थुकियात प्रदेश गौरव आयोजनाया रुपय् न्ह्यःने यंकेत प्रस्ताव याःकथं ज्या जुयाच्वंगु दु’, वय्कलं धयादिल ।

थुगु मार्ग निर्माण लिपा स्वनिगःया डाँडाय् पर्यटकीय क्षेत्रया तकं प्रचारप्रसार जुयाः पर्यटन प्रवद्र्धनय् ग्वाहालि जू वनीगु विश्वास याःगु दु । पर्यटन व्यवसायी इन्द्र लामां सिपुच्व नागार्जुन राष्ट्रिय निकुञ्ज लगायतया क्षेत्रय् केबलकार निर्माण यायेत नं काठ चक्रपथया पूर्वाधारं ग्वाहालि जुइ धयादिल ।

काठ चक्रपथ निर्माणया निंतिं सतकया केन्द्रविन्दुपाखें निखेरं न्यागू–न्यागू मिटर जग्गा कायेगुकथं मापदण्ड क्वःछिनातःगु दु । सरकारं मुआब्जा पुले मफइगु जूगुलिं जग्गा बीत इच्छुक मजूपिं छेँ थुवाःया थासय् सतक निर्माण रोक्का याइगु जुयाच्वंगु दु । थज्याःगु अवस्थाय् प्राविधिक रुपय् सम्भव दत्तले मेगु थासं सतक यंकेगु तकं तयारी याःगु दु ।

केन्द्र सरकारं बाहिरी व प्रदेश सरकारं काठ उपत्यका चक्रपथयात प्राथमिकता बियाः न्ह्यःने यंकल धाःसा स्वनिगलय् अप्वया वनाच्वंगु जनसंख्याया चापयात व्यवस्थित यायेत ग्वाहालि जुइगु विश्वास यानातःगु दु ।

थ्व स्वयां न्ह्यः चीन सरकारया ग्वाहालिं निर्माण जूगु २८ किमिया चक्रपथ पिने बस्ती अप्वया वनाः सहरया रुपय् विकास जुइधुंकूगुलिं बाहिरी व काठ उपत्यका चक्रपथ राजधानी सहरय् बसाइँसराइँ जुयाः वइपिंत व्यवस्थापन यायेत दूरगामी सोचजुइगु प्रदेशसभा सदस्य फुयाँलया ठहर दु । थौंकन्हय् नगरपालिका घोषणा यायेधुंकूगु येँ, यल व ख्वपया ग्रामिण भेगया आपालं जग्गा खण्डीकरण जुयाः गुलिखे थासय् धमाधम आवास निर्माण जुया वनाच्वंगु दु ।

सम्बन्धित बुखँ

LEAVE YOUR COMMENTS