गोर्खा भर्तीइ मिस्त मछ्वयेगु निर्देशनया अन्यौल
येँ – ब्रिटिश गोर्खा सेनाय् नेपाली मिस्त भर्ना याके मबीगु निंतिं प्रतिनिधिसभा संसदया छगू समितिं निर्देशन बीवं थ्व निर्देशन गुलि तक पालना जुइ धयागु खँय् चर्चा सुरु जूगु दु । संसदया अन्तर्राष्ट्रिय सम्बन्ध समितिं थ्व निर्देशन बिउसां सरकार हे थौंकन्हय् रेमिट्यान्सया निंतिं नेपाली ज्यामित विदेशय् छ्वयेत रोजगार गन्तव्य माः जुयाच्वंगु अवस्थाय् गोर्खा भर्ती थेंज्याःगु आकर्षक थाय् त्वःतेत गुलि तयार जुइ धयागु खँय् वहस सुरु जूगु खः ।
बेलायतं गोर्खा सेनाय् आकिवंनिसें मिस्त नं भर्ना कायेगु योजना दयेकातःगु दु । संसदीय समितिया थ्व निर्देशन बेलायतया रक्षा राज्यमन्त्री मार्क लाङ्कास्टर नेपाः भ्रमणय् वयेत्यंगु इलय् वःगु दु । उकिं नं थ्व निर्देशनयात अर्थपूर्ण रुपं कयाहःगु दु । नेपाः भ्रमणय् वयाच्वंम्ह बेलायती रक्षा राज्यमन्त्रीयात गोर्खा भर्तीइ सम्झौता यायेमाःगु खँ न्ह्यथनेगु निंतिं जक थ्व निर्देशन वःगु अनुमान नं छुं कुटनीतिज्ञतय्सं यानाहःगु दु ।
अन्तर्राष्ट्रिय सम्बन्ध समितिं गोर्खा भर्ती बारे पुलांगु सन्धिया पुनरावलोकन मजूनिगु तर्क तयाः मिस्तय् भर्ना तुरुन्त दिकेत निर्देशन बिउगु खः । समितिया निर्णयय् धयातःगु दु, ‘गोर्खा भर्ती सन्धिया पुनरावलोकन यानाः नेपाःया संविधान व लोकतान्त्रिक प्रणालीया मान्यता कथं नेपाःया परराष्ट्र नीतिया कार्यान्वयन यासें नेपाल सरकारया सहमति मदयेकं नेपाली मिस्तय्त बेलायती सेनाय् भर्ना यायेगु ज्या तुरुन्त दिकेत व छुं ई न्ह्यः भर्ना याःपिं मिस्तय्त नं लित सःतेत निर्देशन बीगु जुइ ।’
समितिया निर्देशन बारे परराष्ट्रमन्त्री प्रदीप ज्ञवालीं धाःसा छुं प्रतिक्रिया बिउगु मदुनि । बीबीसीलिसे खँ ल्हासें मन्त्री ज्ञवालीं संसदीय समितिया निर्देशन बारे विस्तृत रुपं बुझे यानाः जक प्रतिक्रिया बीगु खँ धयादीगु दु । तर वय्कलं सोमवाः निसें नेपाः भ्रमणय् वयेत्यंम्ह रक्षा राज्यमन्त्री लाङ्कास्टरलिसे गोर्खा सैनिकतय् समस्या बारे सहलह जुइगु संकेत धाःसा बियादीगु दु ।
भूतपूर्व गोर्खा सैनिकत नं नेपाली मिस्तय्त गोर्खा भर्तीइ छ्वयेगु खँया विपक्षय् हे दु । भूतपूर्व गोर्खा सैनिकतय्सं संसदीय समितिया निर्णययात लसकुस यासें ब्रिटिस सेनाय् नेपाली मिजंतय्त जुयाच्वंगु भेदभावया अन्त्य मयासे मिस्तय्त छ्वये मजिउगु खँ धाःगु दु ।
अथे खःसां यक्व ध्यबा दइगु व लिपा वनाः बेलायतय् तकं च्वने खनीगु जूगुलिं ब्रिटिस गोर्खा सेनाय् अझ नं नेपाःमितय् आकर्षण उतिकं हे दु । उकिं आः मिस्तय्त नं भर्ना यायेगु धकाः वःगु योजना व संसदीय समितिया निर्देशनयात नेपाः सरकारं गुकथं काइ धयागु यक्वसिया ध्यान वनाच्वंगु दु ।
LEAVE YOUR COMMENTS