पार्टी एकता संस्थागत मजूगु स्वीकार

येँ – नेकपाया अध्यक्ष पुष्पकमल दाहालं तत्कालीन एमाले व माओवादी एकता संस्थागत जुइ मफुगु खँ स्वीकार यानादीगु दु । म्हिगःनिसें न्ह्याःगु नेकपा स्थायी कमिटीया बैठकय् कार्यकारी अध्यक्ष दाहालं न्ह्यब्वयादीगु रानीतिक प्रतिवेदनय् नेकपा संस्थागत ढंगं न्ह्याये मफुगु व अन्योलग्रस्त अवस्थाय् च्वनाच्वंगुलिं गुटबन्दी जूगु खँ नं न्ह्यथनातःगु दु ।

प्रतिवेदनय् पार्टी एकता ऐतिहासिक व राजनीतिक निकासया निंतिं ज्वःमदुगु खःसां नं पार्टीयात पूर्ण एकता यायेगुली धाःसा लिबाःगु व उकिया कारण अन्योल व गुटबन्दी खः न्ह्यथनातःगु दु ।

प्रशिक्षण व स्कुलिङया अभावं एकता लिपा पार्टी अन्योलय् लानाच्वंगु धासें पार्टी दुने घात व अन्तर्घात अप्वया वनाच्वंगु खँ नं उकी धयातःगु दु । उकी न्ह्यथनातःगु दु, ‘पार्टी संस्थागत मदु, बरु थीथी कथंया गुटत अप्वया वनाच्वंगु दु, उकथं हे पार्टीइ अराजकता नं अप्वया वनाच्वंगु दु ।’

पार्टीया स्तर दयनीय अवस्थाय् दुगु व अनुशासन हीन जुया वनाच्वंगु खँ नं प्रतिवेदय् न्ह्यथनातःगु दु । प्रतिवेदनय् आलोचना, आत्मालोचना, बांलाःगु ज्या याइपिंत प्रोत्साहन व मखुगु ज्या याइपिंत कारबाही यायेगु प्रवृत्ति मदुगुलिं उकियात सुधार यायेमाःगु खँ नं न्ह्यथनातःगु दु ।

दछि लिपा च्वंगु स्थायी कमिटीया बैठकय् नेकपाया मेम्ह अध्यक्ष केपी शर्मा ओलीं नं ब्वति कयादीगु खःसां वय्कः छुं ई च्वनाः बैठकं पिहां झाःगु खः । बैठकय् ओलीं थःगु स्वास्थ्य बुलुहुँ सुधार जुया वयाच्वंगु खँ कनादीगु खः ।