सांसद शाक्यया नेतृत्वय् मरुसतः पुनःनिर्माण समिति

मरुसतः प्यदँ दुने दयेके क्वचायेकीगु

येँ – तःभुखाचं पाःताः जुइक दुना वंगु मरुसतः हानं दनेगु लागिं जनस्तरं समिति गठन याःगु दु । म्हिगः जूगु छगू मुँज्यापाखें ३ नम्बर प्रदेश सभाय् येँपाखें त्याना वंम्ह सांसद राजेश शाक्यया अध्यक्षताय् उगु समिति गठन याःगु खः । ‘काष्ठमण्ड मरुसतः पुनर्निर्माण समिति’ नामं समाजया थीथी ख्यलय् सक्रियपिं व्यक्तित च्वनाः उगु समिति नीस्वंगु खः ।

समितिया नायः सांसद शाक्यं कनादी कथं समितियात संघीय सरकार, प्रदेश सरकार व स्थानीय सरकारयात स्वीकृति प्राप्त जूगु दु । थ्वहे वैशाख महिनाया दुने छगू तःजिगु ज्याझ्वः यासें मरुसतः पुनर्निर्माणया ज्या न्ह्याकेगु बारे सहलह जुयाच्वंगु खँ नं वय्कलं कनादीगु दु ।

मरुसतः दयेकेगु लागिं जनस्तरं गठन जूगु थ्व मूल समिति खः । थुकियात येँ महानगरपालिकां छगू निर्देशक समिति गठन यानाः माःगु ग्वाहालि याइ । उगु निर्देशक समितिया ज्या केवल थ्व मूल समितिं यानाच्वंगु ज्यायात ग्वाहालि यायेगु जक जुइगु खँ नं वय्कलं कनादीगु दु ।

थ्व समितिं फयांफछि प्यदँया दुने हे मरुसतः पुनर्निर्माण यायेगु ज्या सम्पन्न याइगु खँ नं धाःगु दु ।

सम्बन्धित बुखँ

LEAVE YOUR COMMENTS